16. 5. 2016: У хыжцї з Якубян одкрыли Ізбу Яна Олейника

В сканзенї, котрый ся находить під замком в Старій Любовнї, одкрыли в деревяній хыжцї, котра походить із русиньского села Якубяны, окрес Стара Любовня, Ізбу Яна Олейника, вызначного словацького етноґрафа, котрый много свої бадань робив і в русиньскых селах того реґіону. Іформовала і тім словацька пресова аґентура SITA.

Олейник даровав до Любовняньского музею, котрому належыть і спомянутый сканзен, россяглу бібліотеку і веце як 220 тісяч особных предметів. Бібліотека має 120 звязків літературы, котра є присвячена головно етнолоґії, етноґрафії і антрополоґії.

Святкованя в сканзенї з одкрытем ізбы

„Є про нас честёв, доктор Oлейник ня ословив уж перед роком і пів з пропозіціов, же бы хотїв часть свого жывота передати до збірок нашого музея. Было то про нас миле несподїваня, же нам хоче даровати многы барз цїнны історічны предметы,“ увів директор музея Далібор Мікулік.

Eтноґраф Олейник святковав 10-го мая свій жывотный юбілей – 95 років. Святкованя проходило якраз у сканзенї під градом Любовня. „Приготовили сьме про нёго веце дарунків. При тій нагодї сьме якраз у деревяній хыжцї з Якубян, де він часто ходив робити баданя, одкрыли і кабінет етноґрафа, то значіть Ізбу Яна Олейника. Хочеме, жебы навщівници відїли, же то, же ту стоїть сканзен і ёго експозіція, є і велика робота якраз одборників з области етноґрафії,“ высвітлив директор музея і додав, же ся взаємно обдаровали, бо пан Oлейник у віцї 95 років брав участь на цїлім святкованю в сканзенї.

Ян Олейник многы свої етноґрафічны роботы, головно з баданя русиньскых сел, публіковав у русиньскій періодічній пресї.

Наймолодшый сканзен має і русиньску архітектуру

Сканзен під Любовняньскым замком належыть ку наймолодшым на Словакії і быв одкрытый у 1985-ім роцї. В сучасности го творить 25 обєктів. Домінантов є деравяна ґрекокатолицька Церьков св. архангела Михаіла із 1833-го року зо села Матисова, котра має бароково-класіцістічный іконостас. Церьков належыть до вызначных памяток деревяной церьковной архітектуры на выходній Словакії.

В сканзенї мож найти і далшы архітектонічны обєкты, котры походять головно із русиньскых сел окресу Стара Любовня. Домы збудованы на зачатку 20-го столїтя походять із Великого Липника, Літмановой, Удола, Якубян, Кремной, Камюнкы, Орябины і словацького села Велика Лесна.

Частёв експозіції суть і технічны будовы, як ковальска кузня із другой половины 19-го сторічя, млин ці дїлня столяря.

П. М.