16. 6. 2023: В Пряшові одбыв ся 32-ый рочник Фестівалу духовных пісень візантійского обряду

Як інформує Інформачный центер Пряшівской архієпархії, в Ґрекокатолицькім катедралнім соборї святого Йоана Крестителя звучали почас вікенду, од 9-го до 11-го юна 2023-го року, духовны піснї візантійского обряду в інтерпретації храмовых хорів.

Хоры зышли ся в Пряшові в рамках 32-го рочника Фестівалу духовных пісень візантійского обряду. Фестівал почав у пятніцю, 9-го юна, літурґіёв, котру одслужыв владыка Петро Руснак, апостольскый адміністратор Пряшівской архієпархії і братїславскый єпарха. На літурґії співав Ґрекокатолицькый хор Глагол з Парохії священомученика Павла Петра Ґойдіча в Пряшові на Сідлиску 3.

 

Субота – головный фестіваловый день

Проґрам триднёвой події продовжовав у суботу, 10-го юна, фестіваловым концертом. На концерті брало участь сім хорїв.

Як першый выступив домашній Ґрекокатолицькый катедралный хор святого Йоана Крестителя, якый в катедралнім соборії співать вже пятьдесять років, і ёго спів уж могли чути на многых місцях нелем на Словакії, але і в загранічу.

Наймолодшый хор – Хор святых Семочісленників із Собранець, котрый быв основаный пять років тому, выступив як другый. Пак продовжовали Хор святого Йосифа при Базиліцї Святого Духа в Михалівцях, якый пише вже 30-рочну історію, а Ґрекокатолицькый хор Стаурос з Ґрекокатолицькой парохії Воздвиженія Честного Креста в Пряшові на Сідлиску Секчов.

Другу часть концерту одкрыв Ґрекокатолицькый храмовый хор Павла Петра Ґойдіча з Воронова над Топлёв-Чемерного. По нїм наслїдовав Хор святого Романа Сладкопівця, котрый творять семінарісты з Ґрекокатолицькой духовной семінарії блаженого Павла Петра Ґойдіча. На кінцю фестівалного концерту выступав Катедралный хор Кірілометодіон з Братїславы.

Піснёв Буди імя Господне в обробці композітора Димитрія Бортняньского в інтерпретації вшыткых выступаячіх хорів закінчів ся фестіваловый суботній концерт.

 

В недїлю співало ся в пряшівскых храмах

Третїй день фестівалу продовжовав співом хорів на святых літурґіях. В Катедралнім соборі святого Йоана Крестителя співав о 8.00 год. Хор святого Йосифа з Михаловець, на літурґії о 10.00 год., в рамках котрой было удїлене діаконьске рукоположіня, співав Катедралный хор Кірілометодіон з Братіславы.

В Храмі блаженого священомученика Павла Петра Ґойдіча на Сідлиску 3 о 10.30 год. співав Ґрекокатолицькый хор Стаурос зо Сідлиска Секчов, а в Храмі Воздвиженія Честного Креста на Сідлиску Секчов співав о 10.00 год. Ґрекокатолицькый хор Глагол із Сідлиска 3.

Орґанізаторами фестівалу были Ґрекокатолицька архієпарія в Пряшові і Здружіня Сакралны співы Выходу. Фестівал быв підпореный Фондом на підпору уменя і Містом Пряшів.

Петро МЕДВІДЬ, ЛЕМ.фм, языкова і ґрафічна управа: АРК в СР