16. 8. 2023: Русиньскый одпуст в Шаёвпалфалі

Вже стало традіціёв, же на кінцю авґуста русиньскы ґрекокатолици в Мадярьску стрїчають ся в селї Шаёвпалфала на русиньскім одпустї, де молять ся ку Павловскій чутворній іконї Пресвятой Богородіцї.

І тот рік з містнов парохіёв одпуст орґанізує Русиньске самосправованя Шаёвпалфалы, Вседержавне русиньске самосправованя, вєдно з далшыма русиньскыма самосправованями і орґанізаціями, а одбуде ся в 27-го авґуста 2023-го року.

Тогорочный русиньскый одпуст зачне утренёв, по котрій буде наслїдовати торжественна літурґія, яку одслужыть Ёго Преосвященство Атаназ Ороз, мішколцьскый єпарха. Главным прокровителём русиньского одпусту є Віра Ґіріц, посланкыня Парламенту Мадярьска за Русинів.

Чудотворна ікона

Шайовпалфала (стара славяньска назва села – Павлово) находить ся в Боршодьско-абовско-земпліньскій жупі, в окресї Мішколць. Ґрекокатолицька парохія в Шаёвпалфалі записала ся до історії тым, же там слызыла ікона Пресвятой Богородіцї.

В містнім храмі од праздника Рождества, за старым календарём, аж до 16-го януара 1717-го року, слызыла ікона, котра была на престолї. Зачало то почас літурґії в першый день праздника Рождества.

Ікону на приказ яґерьского римокатолицького єпіскопа пак однесли до міста Яґер і там єй скрыли. Хоць многы ґрекокатолицькы священици і єпіскопы в історії просили, жебы їм ікона была вернута, 256 років віруючі не знали, што є із Павловсков чудотворнов іконов і як вызерать, бо з нёй не была зроблена ани копія. Аж 25-го октобра 1973-го року была ікона римокатоликами вернута до храму в селї.

Петро МЕДВІДЬ, ЛЕМ.фм