17. 1. 2020: Контроля лїків інформує, же меншыновый язык бы мав быти і в апатыках

Словацькый Державный уряд про контролю лїків (Štátny úrad pre kontrolu liečiv), на своїй вебовій сторінцї інформує, же меншыновы языкы бы мали быти хоснованы і в апатыках. Недотримованя закона треба голосити.

Уряд про контролю лїків быв як орґан державной справы ословленый Урядом уповномоченого влады Словацькой републікы про народностны меншыны зо жадостёв о сполупрацу при пошырёваню свідомости о тім, же ся в апатыках мають давати інформації і в языках народностных меншын. Уряд ся при тім одкликує на конкретный текст закона, котрый рїшыть поволїня про додавателїв апатыкарьской старостливости.

Основны інформації і в меншыновім языку

В селах і містах, як пише ся і на сайтї Державного уряду про контролю лїків, в котрых обчане Словацькой републікы, котры належать ку народностній меншынї, творять найменше 20 процент населїня, інформації, котры дотуляють ся огрожіня жывота, здоровя, безпечности або маєтку обчанів Словацькой републікы уваджають на місцях приступных людём коло державного языка і в языку меншыны.

Уряд на сайтї ознамує, же то платить і про апатыкы. В припадї апатык і їх філій бы мали быти в языку меншыны главно інформації о тім, хто має ліценцію на апатыку, мено і призвіско ведучого, назва і адреса апатыкы, робочій час, але і інформація о тім, хто має поготовостну службу, кедь є апатыка заперта.

Меджі далшы інформації, котры бы мали быти і в языку меншыны, належать, наприклад, порядок рекламацій, высше спомянуты інформації, котры дотуляють ся огрожіня жывота, здоровя, безпечности і маєтку, але познакомлїня паціентів о тім, што робити з небезпечным одпадом.

Недостаткы мож голосити

Уряд інформує, же він сам не выконує контролю дотримованя тых обовязків, котры суть записаны в законї о хоснованю языків меншын. Покля такы інформації має, подавать їх Уряду влады Словацькой републікы, котры має в тых припадах право рїшыти.

Но єдночасно контролный уряд додавать, же покля хтось має інформації о недостатках в апатыках што до хоснованя языків народностных меншын, чім ся порушує закон, може тоты інформації заганяти прямо на Уряд влады СР – Уряд уповномоченого влады СР про народностны меншыны.

Петро МЕДВІДЬ, ЛЕМ.фм