17. 1. 2023: Архієпіскоп Ґуджеротті перевзяв посаду префекта Дікастерії про восточны церькви

В понедїлёк, 16-го януара 2023-го року, архієпіскоп Клаудіо Ґуджеротті перевзяв у Римі функцію префекта Дікастерії про восточны церькви.  Інформовав о тім портал Oriente Cattolico. Нового префекта привітав по приходї до уряду секретарь дікастерії архієпіскоп Джорджо Деметріо Ґалларо, і підсекретарь Монс. Флавіо Паче.

На полудне в Честній салї за участи послів католицькых патріархів і верьхнїх архієпіскопів при Святїшім Престолї, ректорів восточных колеґій в Римі, дакотрых представителів востосчных мужскых і женьскых монашескых чінів і конґреґацій присутных в Римі, ректора Папского восточного інштітуту і конзулторів дікастерії было прочітане писмо Святішого Отця Франціска, котрым призначів Клаудія Ґуджеротті за нового префекта того ватіканьского уряду.

Новый префект наслїдно прочітав сімбол віры і склав присягу вірности. Пак адресовав участным приговор, в котрім высловив вдячность і сыновску одданость Вселеньскогому Архієреёви.

21-го новембра 2022-го року Папа римскый Франціск призначів за префекта Дікастерії про восточны церькви Преосвященого Клаудія Ґуджеротті, тітуларьного архієпіскопа равеллского, в тім часї апостольского нунція у Великобрітанії.

Дікастерія про восточны церькви є дікастеріёв Римской курії і їй задачов є старати ся о 23 восточных церьквей, якы суть в єдности з Апостольскым престолом. Была основана у 1917-ім році як Конґреґація про восточны церькви. Папа римскый Франціск апостольсков конштітуціёв Praedicate evangelium ку 5-му ну 2022-го року змінив назву з конґреґації на Дікастерію про восточны церькви.

Петро МЕДВІДЬ, ЛЕМ.фм. Ґрафічна і языкова коректура: АРК в СР.