17. 1. 2024: Русины в Сербії святкують свій день. Централны святкованя будуть через вікенд

17-ый януар в нашім календарї є записаный як День Русинів Сербії.

Русины на нижній землї припоминають собі тот день як дату, коли у 1751-ім роцї радник Марії Терезії і адміністратор Кралёвско-державного Бачского діштрікту в Зомборї – Франц Йозеф де Редл, підписав першый документ о населёваню 200 русиньскых ґрекокатолицькых родин до втогдышнёго Великого Керестура.

Як є звыком, покля День Русинів выйде на день почас робочого тыждня, централны святкованя будуть проходити найблизшый вікенд, конкретно в недїлю 21-го януара 2024-го року.

Сербскы Русины каждый рік орґанізують централны святкованя в іншім селї або містї, в котрім жыють, тот рік святкованя будуть в недїлю проходити в Дюрдёві. В рамках проґраму централных святковань буде в недїлю одкрыта выстава о історії жывота Русинів у Дюрдёві, а на восьму годину вечур є приготовлена святочна академія.

Уж почас Дня Русинів Сербії, 17-го януара, в Дюрдёві суть завішены русиньскы флаґы на будові містного уряду, школы і културного дому.

Но святкованя проходять традічно і в іншых містах а селах. 17-го януара будуть вечур проходити святкованя в Коцурї і Шыдї, 19-го януара орґанізують ся святкованя в Новім Садї і Суботіцї. Сримска Митровіця одсвяткує День Русинів Сербії 18-го януара. 19-го януара будуть святковати в Кулї, Руськім Керестурї, Бачінцях, Бікічу і Новім Орахові. Тогорічны святкованя закінчать ся 28-го януара у Вербасі.

Дата Дня Русинів Сербії была офіціално выбрата у 2007-ім роцї, а першы святкованя орґанізовали ся в януарі 2008-го року.

Петро МЕДВІДЬ, ЛЕМ.фм, языкова і ґрафічна управа: АРК в СР