17. 10. 2023: На розвиток Пряшівского краю піде 180 міліонів евр
Інвестіції підуть до ціклотранспорту ці школства.
На теріторіалный розвиток Пряшівского краю піде майже 180 міліонів евр, інформує Оддїлїня комунікації Пряшівского самосправного краю (ПСК). Перероздїлили ся меджі першых 85 проєктовых замірів із різных областей.
Уможнять наприклад выбудовати Талентцентер, інтеліґентны автобусовы заставкы, центры інтеґрованой здравотной старостливости ці містьскы яслї. О роздїлїню фінанчных средств вырїшовало 6-го октобра 2023-го року Рада партнерства ПСК, котрой задачов є забезпечіти ефектівне черьпаня еврофондів у новім проґрамовім періодї.
Ідеме на сістему, котра фунґує в Польщі
Представителї державной справы, реґіоналной і містной самосправы, як і далшы ключовы партнеры із субреґіонів Спіша, Шаріша і Земпліна, конкретно подникательскый, обчаньскый і академічный сектор, схвалили 85 проєктовых замірів у 29-ох областях, і меджі них роздїлили майже 180 міліонів евр.
Із того 153 міліонів представлює дотацію Европского фонду реґіоналного розвитку. Іде о першу частку фінанцій із цїлковой сумы 250 міліонів евр алокованых про ПСК в новім проґрамовім періодї в рамках Проґраму Словакія.
„Помалы набігуєме на сістему, котра фунґує в Польщі. То значіть, же о черьпаню еврофондів будуть вырїшовати реґіоналны штруктуры, значіть теріторія. Із 16 процент актуално діставаме ся на 19 процент еврофондів, котры має в компетенції высшый теріторіалный цїлок. Но іщі все сьме далеко од помыселных 44 процент польскыx еврофондів,“ повів почас засїданя Рады партнерства ПСК пряшівскый жупан Мілан Маєрьскый.
Наперек тому за словами председы ПСК ся іде допереду, што є добра новина про Пряшівскый край і ёго жытелїв. „Чім веце маєме грошей в реґіонах, тым векшый і скорїшый є розвиток,“ повів далше Маєрьскый.
Інвестіції до розмаїтых областей
Першы інвестіції бы мали іти до области школства, конкретно до 14-ох проєктовых замірів, до здравотництва, де іде о три проєкты, як і до соціалных служеб ці розвитку транспорту, де є схваленых 20 проєктів, а наконець і до турістічного руху, причім в тій области іде о 35 проєктів.
На розвиток транспорту в реґіонї Спіша і Шаріша схвалила Рада партнерства ПСК в І. етапі заміры за майже 55 міліонів евр. Грошы мають іти на будованя, модернізацію і реконштруцкію драг ІІ. і ІІІ. класы, а так само на розвиток утримательного інтеґрованого транспорту, в рамках чого будуть куповати ся еколоґічны автобусы, будовати мултімодалны транспортны теміналы і інтеліґенты автобусовы заставкы.
„Ціклотранспорт і ціклотурізм підпорив ся алокаціёв 11 мілінов евр, головно іде о добудованя меджінародной біціґлёвой стежкы Eurovelo 11. Но в рамках турістічного руху сьме напрямили інвестіції і до розвитку културной а природной дїдовизны в околіцї Домашы ці на теріторії Полонин, значіть до реґіону Вышнёго Земпліна,“ інформовав Маєрьскый.
„Самособов, далшов нашов пріорітов у ціклістіці і турізмі суть єднозначно Полонины, де піде 15 міліонів евр, з того 6 міліонів на выбудованя трасы Poloniny Trail“, доповнив председа ПСК.
Думать ся і на соціалну сферу
В соціалній сферí фінанції выдїлили ся на підпору містьскых ясель, добудованя і оправу двох домів соціалных служеб і пятёх домів крізового бываня, і то в цілковій сумі 11 міліонів евр. В рамках школства суть грошы схвалены на злїпшіня освітнёй інфраштруктуры на середнїх школах, як і на розвиток одборной приправы і цїложывотной освіты.
Край хоче на своїй теріторії так само выбудовати три новы центры інтеґрованой здравотницькой опікы, причім піде о проєкты за 4 міліоны евр.
Цїлкова алокована частка фінанцій про розвиток Пряшівского краю є роздїлена на веце етап. Зіставать так іщі 100 міліонів евр, о котрых буде знова вырїшовати реґіон, а то іщі того року. Подавати проєкты на підпору так будуть мати можливость іщі далшы жадателї.
Петро МЕДВІДЬ, ЛЕМ.фм, языкова і ґрафічна управа: АРК в СР
