17. 11. 2023: Председом Карпаторусиньского конзорціума став Ніколас Купеньскый
Новым председом Карпаторусиньского конзорціума Северной Америкы став Ніколас Купеньскый. Конзорціум о тім інформовав у пресовій справі, котра была публікована 11-го новембра 2023-го року.
Асоціованый професор (доцент) Др. Ніколас Купеньскый учіть російскый язык і літературу на Академії воздушных сил Споєных штатів Америкы, а так само довгодобо занимать ся русиньсков літературов, головно Емілійом Кубеком.
Контактны особы про Вашінґтон і Европу
До функції конзорціума быв выбратый Ніколас Купецькый 9-го септембра, мандат має на єден рік. „Єм вдячный за принагоду рядити конзорціум тот рік вєдно з нашыма америцькыма і европскыма партнерами,“ повів новый председа конзорціума.
Конзорціум творять председове шестёх карпаторусиньскых културных орґанізацій Северной Америкы: Павел Роберт Маґочій за Карпаторусиньскый научный центер, Шарон Джарров за Карпаторусиньске общество, Богдан Горбаль за Лемківску асоціацію, Карен Варян за Русиньску асоціацію, Марія Сілвестрі за Фундацію Тімо, і Ніколас Купеньскый за Світову академію русиньской културы.
Конзорціум почас свого октобрового засїданя выбрав так само заступників членів за окремы членьскы орґанізації. Так само конзорціум призначів свої контактны особы, котров про Вашінґтон стала Елейн Русинко, а про Европу Томаш Калинич.
Підпора лїтнёй школы і вопрос Русинів на Українї
Карпаторусиньскый конзорціум Северной Америкы далше в пресовій справі оцїнює свою роботу за попереднїй період.
Карпаторусиньскый научный центер наприклад в тім роц підпорив Меджінародну лїтню школу русиньского языка і културы Studium Carpatho-Ruthenorum 2023, котра орґанізує ся на Пряшівскій універзітї в Пряшові. Тот рік была школа по трирочній перерві, што запричінила пандемія. Фундація Тімо заплатила десять штіпендій про участників школы, а Карпаторусиньскый научный центер єдну штіпендію.
Конзорціум інформує і о тім, же професор Павел Роберт Маґочій взяв участь на Світовім конґресї Русинів у Новім Садї. „Конзорціум планує підтримовати намагы Світового конґресу Русинів бранити права карпатьскых Русинів як народностной меншыны почас процесу приступу Україны до Европской унії,“ пише ся в документї.
Кедьже Маґочій быв єдиным участником тогорочного конґресу із Северной Америкы, а єдночасно є честным председом Світовой рады Русинів, конзорціум в проходячім меджіконґресовым періодї 2023 – 2025 буде в Світовій радї Русинів за Северну Америку представляти Ніколас Купеньскый.
Выдавательска робота і діґіталізація
Карпаторусиньскый научный центер має в планї далше підтримовати выдаваня і дістрібуцію книг на русиньскы темы, включно комплетного перекладу Нового Завіта, котрый зробило на Словакії Общество святого Йоана Крестителя. Русиньскый перекладє приготовленый до друку.
Як далше інформує конзорціум, Карпаторусиньскый научный центер і Світова академія русиньской културы орґанізують округлый стіл ку пятому выданю книгы Павла Роберта Маґочія з назвов Our People: Carpatho-Rusyns and Their Descendants in North America (Нашы люде: Карпатьскы Русины і їм потомкы в Северній Америцї), котре вышло в тім роцї. Перше выданя є з року 1984, в найновішім суть актуалізованы дакотры тексты, штатістічны даны, а так само приданы новы знимкы і мапы.
Округлый стіл одбуде ся 2-го децембра у Філаделфії, штат Пенсілванія, і презентації на нїм будуть мати Річард Кастер, Богдан Горбаль, Патріція Крафчік, Ніколай Купеньскый і Роберт Зекер.
Припоминаме, же професор Маґочій быв выбратый за члена Польской академії наук і умень в Кракові, што своїм підписом із 1-го авґуста 2023-го року потвердив польскый презідент Анджей Дуда.
Што до выдавательской роботы, конзорціум інформує, же едітором офіціалного пресового орґану Карпаторусиньского общества The New Rusyn Times стала Каріна Муляр.
Лемківска асоціація продовжує у выдавню квартальника Karpatska Rus, котрого едітором є Пол Бест.
Асоціація недавно здіґіталізовала выданя америцькой русиньской ґазеты Лемко з років 1928 – 1940 а так само велику часть выданя далшой ґазеты Карпатска Русь – Karpatska Rus‘- Carpatho-Russia, з років 1940 – 2008. Здіґіталізованы історічны выданя суть доступны на сайтї Лемківской асоціації.
Членьскы орґанізації конзорціума орґанізовали або брали участь і на далшых русиньскых або з Русинами повязаных подіях. Далша стрїча веджіня конзорціума є напланована на децембер.
Петро МЕДВІДЬ, ЛЕМ.фм, языкова і ґрафічна управа: АРК в СР.
