17. 12. 2022: З мышы кожух на зиму

Хотїло бы ся бити, лем треба найти кого.

„Доказы“, котры СБУ нашла почас разії, яка мала быти заміряна на проросійку пропаґанду, діверзію і дїла з тым повязаны, в Хресто-Воздвиженьскім православнім соборї в Ужгородї, суть не потверджінём діверзії Сидора, але потверджінём атакованя Русинів.

Лем недавно польске выдавательство Libra выдало книжку вызначного русиньского історіка, мімо іншого українознателя, Павла Роберта Маґочія під назвов Україна. О державности і народній ідентітї.

Книжка бывшого председы а сучасного честного председы Світовой рады Русинів є доповненов верзіёв експертізы, котра была до Гааґу передложена на Меджінародный судный трібунал. Маґочій, котрый ясно у своїм матеріалї

бранить Україну і їй право на єствованя, а нелем теперь, по зачатку войны, але свої позіції ясно декларовав уж од окупації Криму, є тот сам Маґочій, котрый стояв на челї Світового конґресу Русинів, якый у 2007-ім роцї прияв русиньску народну сімболіку – ерб, флаґ, гімну.

По разії, котра 14-го децембра 2022-го року одбыла ся в ужгородьскім храмі, котрого настоятелём є так само в русиньскім русї познатый православный священик Димитрій Сидор, ся одкрывать вопрос, ці тото має быти подяка Маґочійови і ёго народу за ёго намагы бранити Україну перед меджінародным трібуналом.

Не буду детайлно коментовати разії, котры Служба безпекы Україны робить в будинках Україньской православной церькви, но все ся ку тому пише, же глядають діверзантів, проросійску пропаґанду і так далше.

Діверзію пішли глядати і до Сидора. І што нашли? Очековав бы єм, же покля є разія заміряна на высше спомянуты дїла, пак суть дві можности. Прийдеме, найдеме, опублікуєме, же сьме то нашли. Або прийдеме, не найдеме, і втогды треба ясно інформовати, же ніч таке ся не нашло.

Што зробила СБУ в припаді русиньского священика? Пришла і нафотила русиньскый флаґ, албум русиньского співака, наліпкы лем.фм, історічны ґазеты… Русиньскый флаґ лжыво означіла за флаґ „Републікы Підкарпатьска Русь“, проблемов была і нотація історічной Гімны підкарпатьскыx Русинів. Так само ікона карпаторуськых, значіть русиньскых святых.

Лем де там є діверзія? Де там є московска пропаґанда? Де є єден єдиный артефакт на знимці, котрый бы потверджовав тото, по што там СБУ ішла? Кедь таке штось нашли, чом то не вказали?

Гей, треба признати, же СБУ нашла і окладку „паспорта“, без внутрішніх сторінок, „Републікы Підкарпатьска Русь“. Але вєдно з тым треба спомянути, же за тоту „PR акцію“ коло паспортів ці незалежности підкарпатьскых Русинів Сидор вже быв свого часу покараный.

Пo перше, вышмарили го із Світового конґресу Русинів, котрый ся од дачого такого стріктно діштанцовав, і главну роль там знова грав высше споминаный Маґочій. По друге, Сидор быв судженый і быв одсудженый на условну кару.

Дурнота тримати тоту окладку. Але в нормалных країнах за єден і тот самый карный чін мож быти одсудженый раз. Ці на Українї мають новый штандард, і будуть за тото саме судити веце раз? Все як прийдуть до Сидора мож наново зачати суд?

СБУ пришла з тым, же ідуть поїмати велике звіря, з котрого ушыють Українцям кожух на зиму. Но і кедь уж нашли лем мыш, повіли собі, же холем малый кожух на зиму бы з того міг быти.

Русиньскы орґанізації з цїлого світа од самого початку войны остро одсудили войну і назвали того, хто є аґресор, і хто ся лем бранить. Высловили свою солідарность з Українов, хоць тота держава доднесь їм не узнала права. Русиньскы орґанізації робили благодійны акції, зберали продукты і грошы, жебы помочі людям на Українї, без огляду на їх народность, помагали просто людям в нуждї. І чого ся Русины дочекали?

Дочекали ся того, же намісто переоцінїня позіції Києва односно русиньского народа і ёго прав, СБУ робить з русиньского флаґу флаґ неіснуючой і никым нежаданой з боку Русинів републікы, робить з Русинів сепаратістів, одкрывать проти Русинів внутрїшній фронт, як кебы не старчів тот реалный на выходї країны проти російского аґресора.

Кебы єм хотів робити діверзію і шкодити властній країні, точно так бы єм то робив, жебы зробити шкандал і бунтовати у людей ненависть до даякой ґрупы населїня. Тото была задача СБУ, жебы вєдно з разіёв наваляли ведра бруду на Русинів, і збунтовали людей проти них?

Якбач гей, бо не вірю в можность, же СБУ не знать, же нашли русиньскый флаґ, не флаґ даякой „републікы“, же нашли флаґ, котрый дотеперь хосновав ся на вшыткых русиньскых подіях, котры на Українї проходили, і ниґда то не было жадным проблемом. Же нашли флаґ, котрый прияла меджінародна русиньска орґанізація в рамках своёй народной сімболікы, а не як сімбол даякой державы.

Бо покля бы єм мав вірити тому, же тот флаґ дотеперь СБУ не відїла на нашых подіях і не знала, же то не „державный“ флаґ, але народный, пак може Київ розпустити цїле СБУ, бо дурнїшу безпеку бы сьме не нашли ани в країнах третёго світа, а то нияк не хочу ображати країны третёго світа.

Ціле то вызерать так, же СБУ пришла з тым, же ідуть поїмати велике звіря, з котрого ушыють Українцям кожух на зиму. Но і кедь уж нашли лем мыш, повіли собі, же холем малый кожух на зиму бы з того міг быти. І опубліковали фоткы русиньскых артефактів із лжывыма коментарями. Тото вам людей загріє? Ненавсить вами бунтована? Хотїло бы ся бити, та сьте нашли кого?

Покля мають быти люде на Українї караны за русиньскы флаґы, є то небезпечный прецеденс, на котрый бы мав реаґовати Світовый конґрес Русинів, але і сам Маґочій. Тихо бы не мав быти ани Брусел, котрый дав Києву штатут кандідата на вступ до Унії.

А Київ бы мав думати на то, же за злочіны, котры дїяли ся в рамках войны в бывшій Югославії, пак перед трібуналом в Гаазї судили нелем представителїв єдного народа, поважованого за першого аґресора, але вшыткых, котры тоты злочіны почас войны робили. Хочу вірити, же ся Україна ку такым злочінам, проти даякого малого, слабого, мірного народа, не прихылить.

Петро МЕДВІДЬ, ЛЕМ.фм. Ґрафічна і языкова коректура: АРК в СР.