17. 4. 2019: Ужгород в проєктї з Михалївцями і Шаторолйоуйгелём

В рамках меджінародного україньско-мадярьско-словацького проєкту планують ся засновати в сусїднїх реґіонах містьскы (муніціпалны) ґалерії і професіоналны турістічно-інформачны центры европского штандарду, інформовав україньскый портал Zaholovok.

Єдна ґалерія має выникнути в Ужгородїі, в історічно-културнім комплексї Совине гнїздо, друга в Михалївцях. В Михалївцях із той прічіны будуть реконштруовати історічну ґалерію Золотый бык (Zlatý býk).

 

Проєкт трёх міст

У віторок, 16-го апріля 2019-го року, в просторах Ужгородьской містьской рады быв підписаный договор про реалізацію сполочного ґрантового проєкту із участёв міста Михалївцї на Словакії, Ужгорода і мадярьского Шаторолёуйгелю. Тот проєкт ся буде фінанцовати в рамках Проґраму черезгранічной сполупраці Мадярьско – Словакія – Румунія – Україна 2014 – 2020.

Цїлём проєкту є всокочіня културной дїдовизны в Михалївцях і Ужгородї, презентація того културного богатства, соєдиненя жытелїв пригранічных реґіонів посередництвом културы, уменя, сполочной історії і пропаґація културной дїдовизны як основы розвитку турізму.

Як інформовав протал Zaholovok, в сусїдніх реґіонах мають ся засновати містьскы ґалерії і професіоналны турістічно-інформачны центры. Но в рамках проєкту планують ся і творчі варсштаты, меджінародны пленеровы сімпозіюмы малёваня і скулптуры ці наточіня документарного філму Історія і сучасность сполочного реґіону. Проєкт не забыв ани турістічных проводників, котры ся мають із ґранту друковати.

 

Підняти турістічный імідж

Реалізація проєкту є напланована на 25 місяцїв, першы практічны крокы хотять робити в осени того року.

Олександр Білак із Ужгородьской містьской рады надіє ся, же проєкт подарить ся успішно реалізовати і поможе підняти турістічный імідж міста Ужгород. Місто на Тисї має інтерес і о далшы проєкты в рамках такой сполупраці.

Петро МЕДВІДЬ, лем.фм, жрідло фотоґрафії: Zaholovok.com.ua.