17. 6. 2023: Ніч, лем пропаґанда і політіка
В юни 1943-го року в лондоньскім журналї з назвов The Nineteenth Century and After была публікована статя о політіцї СССР односно Польщі і Чехословакії. Заключіня автора статї были, же односно Чехословакії є російска політіка аж барз приятельска.
В статї ся далше писало, же кедь Москва здобуде выходну Польщу, стане сусїдом чехословацькой провінції Підкарпатьска Русь, і арґумент „покровного братства“, з чім хоче оправдати єдну анексію – Галичіны, послужыть і про арґументацію іншого, бо населїня Підкарпатьской Руси є „єднако як у выходній Галичїнї головно українського походжіня“.
Хоць была статя писана в не так цалком приятельскім дусї, автора статї треба глядати в Москві. Прозраджать то подля історіка Івана Попа хоснованя терміну україньскый. Тот термін быв у Чехословакії неконштітучный, у Великобрітанії незнаный. Про Москву і комінтерну было звычайнов практіков пошырьовати, респектівно куповати собі місце в западній пресї, жебы публіковати нима приготовленый матеріал.
В тім припадї ся Москва постарала о то, жебы была надрукована інформація о жытелях „україньского походжіня“ на Підкарпатьскій Руси в соліднім лондоньскім журналї. Москва так допереду зачала пропаґандістічну акцію, жебы собі люде на Западї звыкли на оддїлїня той части од Чехословакії.
Як то скінчіло, то знаме вшыткы. Москва собі одрїзала як з Польщі, так і з Чехословакії. Із згодов западных союзників.
Кедь собі роблю інтернетовый моніторінґ, штораз частїше стрїчам ся зо статями на україньскых порталах, котры штораз веце в історічных контекстах пишуть о „Русинах“, „русиньскых князях“ і так далше. Самособов в контексті того, же іде о Українцїв. Інтересным є, же іщі перед десятёма роками бы сьте на такы статї трафили, но рідше. Теперь їх якось прибывать.
Інтересне то є зато, бо ся то дїє в часї, коли Кієв тискать ся до Европской унії і Североатлантічной аліанції, но на другім боці Брусел дає ясны пожадавкы што до рїшіня народностных прав.
А і тиск Русинів у світі є штораз міцьнїшый, жебы Україна конечно узнала права Русинів у своїй державі.
Кебы єм хотїв приправити европску ці світову „публіку“ на то, же Русинів не узнам ани кебы ня рїзали, не робив бы єм то іншак, як то днесь мож відїти в даных „історічных“ статях. А они то не роблять іншак, як то робила Москва почас Другой світовой войны, коли уж мала продумане то, же по войнї і так буде лем тота аґресівна злодійска імперія, котра собі возьме, што ся їх захоче.
В Пряшові не є проблем уж рокы стрїтити Українцїв. Пряшівска універзіта рокы приїмать штудентів з Україны, теперь пришли і тоты, котры втекли перед войнов. Покля хтось іщі не стрїтив ани єдного, якбач жыє в іншім часопросторї.
Не раз, ани не двараз єм з такыма людми бісїдовав. Кедь прийдеме до того, же єм Русин, тоты, што суть з Підкарпатя, іщі штось тямлять. Тоты, што суть з далшых реґіонів напрямом на выход, не мають ани фалатча знаня о чім бісїдую. Нелемже не знають такый народ, але ани назва Русин ся їм не капчать з „їх старов назвов“.
В недїлю, 11-го юна 2023-го року, кедь ся одкрывала Меджінародна лїтня школа русиньского языка і културы на Пряшівскій універзітї, зачув єм, як панї, котра нас обслуговала і є з Україны, бісїдовала з професором Маґочіём, же в жывотї не чула о такім народї як Русины, і же аж ту, в Пряшові ся о нас дізнала.
Значіть, покля чоловік стрїчать обычайных людей, „незаанґажованых“ до україньского націоналізму, і они ани не знають о Русинах, кого представлює пак політіка, котру робить Кієв односно Русинів? Бо людей, котры о тім не мають ани найменшого знаня, бізовно тота політіка не представлює.
Односины Україны ку Русинам суть лем брудна політіка і пропаґанда. Кого тота політіка і пропаґанда представлює, якый тіп політікы то є, най уж собі каждый додумать сам. Подобный приклад маєме уж з року 1943.
Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР
