17. 7. 2019: Торжественні одсвяткувано 30-літя «Бесіды» та 35-літя «Голосу Ватры»

12. 7. 2019 торжественні одсвяткувано 30-літя часопису «Бесіда» і 35-літя явліня ся першого по войні лемківского часопису «Голос Ватры».

Конференцийна саля Містецкого Підприємства Комунального Ґаздуваня в Креници выполнила ся гістми. Конферансєром імпрезы был редактор радия ЛЕМ.фм, Севериян Косовскій, а з вводным словом выступил ведучый Стоваришыня Лемків, Андрий Копча. Пак особисты спомины представил Петро Трохановскій (на фото), од початку істнуваня часопису «Бесіда» його головный редактор. Реферат на тему Як «Бесіда» формувала лемківскіст? Стратеґіі буджыня лемківской достоменности хоснуваны в Бесідовых дописах выголосила абсольвентка лемківской філолоґіі, докторантка Ягайлоньского Університету, Марта Ватраль. Петро Трохановскій отримал нагороду од Містецкой Бібліотекы в Креници, з котром од долгых років спілпрацує. Редакторови ґратулювали і другы присутны. Подію прикрасил артистичный проґрам в выконаню Сусанны Ярой, котра одспівала 2 співанкы авторства Петра Трохановского, Юлиі Дошны, котра єдну співанку выконала соло, а другу в дуеті з Петром Трохановскым (Мурянком).

На конец з красным выступліньом вказал ся ансамбль Барвінок зо Словациі. Петро Мурянка підкрислил, што в писмі вказали ся тексты більше як 200 авторів. Барз подякувал вшыткым за присутніст, а пак запросил на малый почастунок, котрым тіж закінчено святкуваня.

Наталія КЛИНКОВСКА, ЛЕМ.фм

(Публікуєме в оріґіналї – лемківскім варіантї русиньского языка.)