17. 8. 2020: Пряшівска ґрекокатолицька метрополія підпорить віруючіх в Бейрутї фінанчнов збірков
Пряшівскый ґрекокатолицькый архієпіскоп і метрополіта Іоан Бабяк по договорї з архієпіскопом Кірілом Василём, апостольскым адміністратором Кошіцькой ґрекокатолицькой єпархії і владыком Петром Руснаком, братїславскым єпархом выголосив на 30-го авґуста міморядну збірку у вшыткых парохіях Ґрекокатолицькой метрополітной церькви sui iuris на Словакії.
Збірка має іти на підпору выходных католицькых хрістіанів, котры суть траплены наслїдками експлозії в главнім містї Лібанону, в Бейрутї. Інформовав о тім Інформачный центер Ґрекокатолицькой архієпархії.
Дві ничівы експлозії в Бейрутї з 4-го авґуста 2020-го року взяли жывот веце як 170-ом людём, тісячі были зранены і понад 300 тісяч людей зістало без стрїхы над головов. Волна тиску по експлозії пошкодила веце катедралных соборів і храмы, з фунґованя вырадила три з пятёх великых шпыталїв у Бейрутї.
Выразили солідарность
Такой по тій нещастній події выразили свою солідарность з лібаноньскыма віруючіма і єпархове Ґрекокатолицькой церькви на Словакії. Метрополіта Іоан адресовав свою близкость мелхітьскому патріархови Юссефови Абсі, котрого утвердив о своїх молитвах і близкости з ёму звіреным народом.
„Молю ся за жертвы того нещастя і за їх родины, так само за зраненых, ці людей, котры пришли о своє обыстя,“ цітовав Інформачный центер Пряшівской архієпархії метрополіту Бабяка.
Солідарность выразив і архієпіскоп Кіріл Василь. „Най понад вшытко милосердный Бог у своїй любви до чоловіка, на ородованя той, котру народ Лібанону честує в їй храмі на Гаріссї над Бейрутом як Нашу Панї Лібанону, удїлить кріпость і потїху вшыткым, котры были постижены тов траґедіёв, главно стратов, ці зранїнём своїх найблизшых, і єднако няй дає силу і мудрость вшыткым заінтересованым на одстранёваню їй наслїдків.“
Центер трёх партіархатів
В Лібанонї діє веце выходных католицькых церьквей і в прямо в Бейрутї мають центер три патріархаты.
Найвекша є мароністька церьков, котрой походжіня є в антіохійскій традіції і веде єй патріарха Бехара Бутрос кардінал Раї. Далшє є то сірійска католицька церьков, котра так само выходить з антіохійской традіції, на челї котрой стоїть Іґнаце Йосеф ІІІ. (Ефрем) Юнан. Третёв патріархалнов церьквов, котра має свій центер в Бейрутї, є армяньска церьков, выходить із армяньской традції, котрой головов є Ґреґоіре (Крікор) Пієрр ХХ. Ґаброян.
Другов найвекшов за кількостёв віруючіх в Лібанонї є Мелхітьска ґрекокатолицька церьков, візантійской традіції, котрой головов є патріарха Юссеф Абсі.
Патріарха має свою резіденцію в сірійскім главнім містї Дамаск, але почас рока вецераз урядує і в резіденції в Бейрутї. Минувшый рік навщівив і Словакію а окрем офіціалных стрїч із представителями властей брав участь і на архієпархіалнім одпустї в Літмановій, а так само навщівив і центер метрополії Пряшів.
Петро МЕДВІДЬ, ЛЕМ.фм, здрой фотоґрафії: Mehr News Agency, CC BY 4.0, языкова управа: ред. АРК в СР.
