18. 2. 2022: Дїти народностных меншын мали варштаты

В просторах Културно-освітнёго дружства Карпаты у Вербасї, Сербія, одбыли ся 12-го фебруара 2022-го року першы із пятёх планованых варштатів в рамках проєкту „Карпати и омладина – вєдно зме моцнєйши‟ (Карпаты і молодеж – вєдно сьме міцнїшы).

Як інформовала аґентура Рутенпрес, на варштатах врали участь дїти вербаскых основных школ, котры приналежать до русиньской, мадярьской і україньской народностной меншыны, і мають волительный предмет свій материньскый язык з елементами народной културы.

Подля слов коордінатора і одповідной особы за проєкт Др. Деяна Загоряньского, котрый є і членом Народного совіту Русинів, цїлём проєкту є, жебы ся презентовав язык, звычаї і култура каждой народностной меншыны через креатівну роботу.

Так само єдным із цїлів є, жебы дїти молодшого віку ся меджі собов спознали, жебы спознали розлічности своїх верстваків, жебы представили і научіли ся даякы шпеціфікы другых народностных меншын, едуковали ся і брали єдны другых як рівноправных без огляду на народностну і реліґійну приналежность.

Вдяка проєкту, подля слов Загоряньского, вкажуть ся шпеціфікы і роздїлы, мултікултураліта, котра є богатством у мултікултуралнім оточіню, якым є і Вербас.

По закончіню проєкту є плановане зорґанізованя квізу, в рамках котрого дїти, котры брали участь на проєктї, будуть мати вказати, як добрї спознали і знають єдны другых. Проєкт „Карпати и омладина – вєдно зме моцнєйши‟ підпорило сербске Міністерство про людьскы права, права меншын і соціалный діалоґ.

Петро МЕЕДВІДЬ, Лем.фм. Ґрафічнас і языкова управа: ред. АРК в СР. Жрідло фотоґрафії: Рутенпрес.