18. 4. 2024: Владыка Йона стрїтив ся з пріматором і посланцями міста Пряшів

Як інформовав Михал Павлишиновіч, говорця Пряшівской ґрекокатолицькой архієпархії, в понедїлёк, 15-го апріля 2024-го року, Высокопреосвященый Йона, пряшівскый архієпіскоп і митрополіта, прияв на Ґрекокатолицькім архієпіскопскім урядї пряшівского пріматора Франтїшка Ольгу і посланцїв міста Пряшів, котры прияли ёго запрошіня.

Гостї кір Йоны посмотрили собі експозіцію Пряшівской архієпархії, і в архієпіскопскій Каплічцї святого Йосифа владыка співом Хрістос воскресе помолив ся за посланцїв, їх родины і їх посланя.

Перед вечерёв митрополіта вшыткых щіро привітав і подяковав за дотеперїшню сполупрацу міста Пряшів і Ґрекокатолицькой церькви. Так само высловив надію, же тота сполупраца про гражданів буде далше розвивати ся.

„Тым, котрым служыте з матеріалного боку, Церьков помагать духовно. Іде нам властно вєдно о тых самых людей, о їх благо,“ повів кір Йона.

„Жычу вам, жебы ся вам добрї вело у вашім важнім і одповіднім посланю а благословлю вам,“ додав владыка у своїм приговорї.

Пріматор Пряшова Франтїшек Ольга в менї вшыткых подяковав за запрошіня і благословлїня про їх роботу на благо Пряшівчанів. Так само представив участных посланцїв і посланкынї владыкови, котрый іщі лем пару місяцїв є на посадї архіпіскопа і митрополіты в Пряшові.

„Стрїча проходила в приємній атмосфері і была з боку владыкы Йоны проявлїнём почливости ку представителям Пряшова, а посередництвом них і ку жытелям міста, котрых они заступають,“ закінчів Павлишиновіч.

Петро МЕДВІДЬ, ЛЕМ.фм, языкова і ґрафічна управа: АРК в СР.