18. 5. 2022: Lemko Hall одсвяткує Русаля

Карпаторусиньскій Америцкій Центр «Lemko Hall» рыхтує ся помалы до свого традицийного пікніку, якій одбуде ся 12. червця/юнія 2022 р. з нагоды Русаля.

Хоц попередні два рокы пікнік не міг ся одбыти з причыны пандеміі, того рока щестливо поведе ся повернути до той ініциятивы.

Долга традиция лемківскых пікніків

Тогорічны Русаля – Ден Святой Тройці (Сошествіє Святого Духа), выпадают за тзв. старым стильом 12. червця/юнія, значыт того рока пікнік одбуде точно в тот ден (поінчы рокы не все давало ся стрітити в ден праздника).

Як реляцийонувал нам при нагоді попередніх едиций подіі єден з орґанізаторів пікніку, Андрий Медвід родом зо Ждыні, традиция лемківскых пікніків сігат часів, коли нашы предкы побудували Lemko Hall. Першы пікнікы были барз великы, приходили на них не лем люде з околиці, але тіж з Пенсильваніі, ачий з Канады.

«Купета люди на тото приходила, но лем коли продали Lemko Hall, то вшытко перестало істнувати. Мы тото тепер уж од добрых парох років хочеме оновити і покус нам іде. Спочатку было тяжко, мало люди приходило […]», бесідувал при нагоді пікніку в 2018 р. Медвід.

Лемківскій Пікнік то нагода на стрічу родаків, еміґрантів, а часто уж лем потомных тых, котры пішли глядати ліпшого жытя в Америці. На подіі буде мож посмакувати лемківскы стравы, поспівати і пограти в футболь ци волейболь.

В проґрамі є наша музика, значыт буде мож погуляти. Сам пікнік одбуде ся в гардых обставинах природы, серед зеленых лісів, якы хоц кус годны припомнути Старый Край. Деталі чытайте на залученым афішы.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)