18. 5. 2022: В Будапештї ішли по слїдах Русинів

В середу, 11-го мая 2022-го року, одбыла ся в Будапештї подія, котру орґанізовала Бібліотека Русинів Мадярьска імени професора Іштвана Удварі під назвов По слїдах Русинів у світї – Русиньскы памятны місця на Підкарпатю, Словакії, в Польщі, Войводинї і Мадярьску.

Подія одбыла ся в будапештяньскій Вседержавній бібліотеці чуджіх языків, і на участных чекали штири інтересны рефераты.

Наперед із приговором привітала участных Анна Марія Поп, котра є директорков Вседержавной бібліотекы чуджіх языків, в якій просторах подія проходила. Книгы, котры говорять о русиньскых памятных місцях і суть у фондї русиньской бібліотекы, одпрезентовала їй директорка Ілдіка Поланскіне Надош.

За вызначны русиньскы місця на Підкарпатя йговорила у своїм рефераті Жофія Чорі, кандідат педаґоґічных наук із Мукачівской державной універзіты. О нашых памятных місцях на Словакії могли участны выслухати реферат, котрый приготовила сполуробітнічка Научного інштітуту імени Антонія Годинкы Іріна Сюч-Ворінка. Янош Ґашпар, председа Кураторьской рады мадярьского фонду културы громадного транспорту, занимав ся у своїм выступі русиньскыма памятныма місяцми в Польщі, Войводинї і Мадярьску.

Подія была орґанізована русиньсков бібліотеков з підпоровов мадярьской влады і Фонду Ґабора Бетлена.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.

Фото: Вседержавна бібліотека чуджіх языків.