18. 5. 2022: В пятницю одкрытя креницкого Бієнале 2022
Стоваришыня Лемків і Світова Рада Русинів кличут до участи.
Уж в найблизшу пятницю, 20. мая, одкрыте буде ХІ Медженародне Бієнале Лемківской/Русиньской Культуры, інформуют о тым Стоваришыня Лемків і Світова Рада Русинів – головны орґанізаторы подіі.
Орґанізувана што два рокы стріча Русинів з ріжных держав Европы і ЗША то нагода на промоцию русиньской культуры, выміну опіній і поглядів, але і самособом до близшого познаня Лемковины, єй люди і звыків.
Два дни, ріжны акциі
Добром традицийом каждого Бієнале єст тото, што участникы оддают найперше поклін вызначному родакови, Епифанови Дровнякови – Никыфорови Креницкому. Подія зачне ся о 13.00 год. панихідом над гробом маляря на близкым до православной церкви св. Владиміра цмонтери.
Дальше на креницкым дептаку гості положат квітя при памятнику посвяченым Никыфорови. Одтамале вшыткы, як єден хоровід, перейдут до Старого Здройового Дому, де о 15.00 год. буде одкрытя выставы лемківскых/русиньскых творців.
В тот ден одбудут ся і концерты русиньскых ансамблів. Перше выступлят ґрупы з Польщы, Словациі і Румуніі, а в вечерній части видіти буде мож другіраз колектив з Польщы і ґрупу з Хорвациі.
В пятницю переданы будут і дві цінны русиньскы нагороды. То Премія ім. Василя Турока-Гетеша признавана для вызначных діячів та нагорода Pro Arte Ruthenorum, яка належна є найліпшым русиньскым творцям культуры.
Субота буде посвячена дискусиям і выміні поглядів. Головном темом має быти проблематика діяльности русиньскых орґанізаций в добі панеміі COVID-19, як і наслідства того, што сама пандемія уж змінила в поєдных обшырях.
В тот ден одбуде ся і засіданя Світовой Рады Русинів. ХІ Бієнале закрыє третій концерт – тым разом ансамблів зо Словациі і Украіны.
З дволітньом перервом
Пропомийме, што первістно ХІ Бієнале мало одбыти ся ярю 2020 р. З причыны тырваючой пандеміі початково было перенесене на осін, але остаточно было одкликане, кєд же в більшости держав світа были введены ограничыня.
Зато тіж тогорічна стріча русиньскых творців одбуде ся такой по штырьох роках – остатнє, Х Медженародне Бієнале Лемківской/Русиньской Культуры было скликане в 2018 р.
I Бієнале прошло в 2000 р. Од початку было оно задумане на подію, котра, як выходит з назвы, буде проходила што два рокы. Рокы без креницкой імпрезы мали быти выполнены подібныма стрічами на полудньовым боці Карпат – в плянах был найблизшый Бардиів, пак Пряшів. Хоц з тых плянів нич не вышло, подія орґанізувана Стоваришыньом Лемків на добре вросла в шор цикличных подій міста Крениця.
Бієнале одраз было задумане так, штобы в рамках той подіі тримати партнерскы односины з другыма орґанізациями, якы входят до складу Світового Конґресу Русинів. Од парох років штораз голоснійшы являют ся постуляты зміны офіцияльной назвы подіі, коли бо придавник «медженародне» не єст правильный. Русины, Лемкы з ріжных держав світа то тот сам, єднакій нарід. Ліпше было бы схоснувати слово «меджедержавне».
Севериян КОСОВСКЫЙ, Наталія МАЛЕЦКА-НОВАК, ЛЕМ.фм.
(Публікуєме в оріґіналї – лемківскім варіантї русиньского языка.)
