18. 5. 2022: Нова мадярьска презідентка пожадала о благословліня і од ґрекокатолицького а православных єрархів

В суботу, 14-го мая 2022-го року, в Будапештї проходила інавґурація новой мадярьской презіденткы Каталін Новаковой. Перша жена у функції презідента Мадярьска, єдночасно наймолодша глава державы в історії зачала інавґурацію нетрадічно.

В Мадярьску презідент собі сам становлює форму і обсяг інавґурації. Каталін Новакова собі як першый презідент выбрала на початок екуменічне богослужіня як окрему часть свойой інавґурації до функції. Екуменічне богослужіня одбыло ся в Костелї реформованой церькви на будапештяньскій Площі Калвіна. Главным служытелём быв Золтан Балоґ, председа Конференції Мадярьской реформованой церькви.

Як інформовав Сілард Костічак про Пресовый центер Кошыцькой єпархії, Балоґ у своїм приговорі підкреслив, же то першый раз, коли римокатолици, ґрекокатолици, євангелици і реформованы, допроводжены суботнёв молитвов Жыдівской реліґійной громады, просять о Боже благословлїня про першого обчана країны.

На жадость новой презіденткы участны представителї хрістіаньскых церьквей окремо каждый благословили главу державы. Меджі нима были і представителї Ґрекокатолицькой церькви а Православной церькви.

Презідентку Мадярька поблагословили кардінал і остригомско-будапештяньскый архієпіскоп Петер Ердо, председаючій єпіскоп Мадярьской євангелицькой церькви Тамаш Фабі, сірійскый православный патріарха Іґнатій Єфрем ІІ., єпіскоп Румуньской реформованой церькви Бела Като, ґрекокатолицькый архієпіскоп гайдудороґскый і метрополіта Філіп Кочіш, метрополіта австрійскый і екзарха про Мадярьско і середню Европу Арсеніос Кармадакіс (під Константінопольскым патріархатом), предсидателька Світовой общіны реформованых церьквей Найла Кашаб, і председа Конференції Мадярьской реформованой церькви Золтан Балоґ.

По екуменічнім богослужіню торжественна подія перенесла ся перед будову мадярьского парламенту, де была Каталін Новакова святочно інавґурована і повіла свій інавґурачный приговор.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фото: Görögblog, MTI.