18. 5. 2023: На градї Любовня будуть реконштруовати далшы обєкты

Як інформовало Оддїлїня комунікації Пряшівского самосправного краю, град Любовня перейде далшов реконштрукціёв. Тота дотулять ся северовыходной стїны і третёго двора.

Народна културна памятка, котра находить ся над містом Стара Любовня, здобыла на проєкт обновы фінанчны средствва з Міністерства културы Словацькой републікы, а так само од свого зряджователя Пряшівского самосправного краю (ПСК), кедьже обєкт належыть Любовняньскому музею.

Сума цїлковых вытрат на далшу фазу реконштрукчных робот представлює 1,217 міліона евр. Проєкт на северовыходну стїну і третїй двор народной културной памяткы – граду Любовня, здобыв на реконштрукцію грошы з вызвы резорту културы Обновме собі свій дім 2023, з котрой прийде на ставебны роботы 650 тісяч евр.

ПСК дасть до проєкту комплексной реконштрукції цїлково 567 500 евр. Співфінанцованя і дофінанцованя проєкту, котрый окрім іншого сохранить воєньскы касарнї із 17-го столїтя, схвалили посланцї Заступительства ПСК в понедіїлё, 15-го мая 2023-го року, на своїм засїданю.

Северовыходна стїна є теперь в гаварійнім ставі, што ся вырїшыть реконштрукчныма роботами. Проєкт так само уможнить одпрезентовати історічны касарнї і археолоґічну локаліту формов сталой експозіції з выхоснованём модерных технолоґій. Проєкт поможе і з презентаціёв старой студнї, респектівно цістерны, котра ся в данім обєктї находить, а так само ся цїлково скултівує третїй двор граду.

По закінчіню реконштрукчных робот будуть обновлены памяткы сприступнены навщівникам граду Любовня.

Любовняньскый музей – град Любовня належыть меджі найнавщівлёванішы културны орґанізації ПСК. Середнє чісло навщівности за рік є приблизно 200 тісяч людей. Реконштрукція і сприступнїня далшых обєктів граду так само має помочі ку іщі векшому інтересу турістів о тоту перлу на северовыході Словакії.

Петро МЕДВІДЬ, ЛЕМ.фм, языкова і ґрафічна управа: АРК в СР