19. 10. 2022: Лавреатом Цїны ПСК тот рік і Юрій Штенё
В понедїлёк, 17-го октобра 2022-го року, проходило 40-те засїданя заступительства Пряшівского самосправного краю (ПСК). Посланцї зышли ся на остатнїм засїданю в такім складї крайского парламенту, кедьже Словакію чекають крайскы і комуналны вольбы.
На проґрамі засїданя было аж 35 пунктів. Окрем іншого, вырїшовало ся о лавреатах Цїны Пряшівского самосправного краю за 2022-ый рік. Меджі лавреатами є і русиньскый неврохірурґ Юрій Штенё.
Трёми лавреаты
На Цїну ПСК, котра ся вже буде передавати 18-ый раз, можуть номінації посылати як пріватны особы, так і орґанізації. Тот рік пришло 16 номінацій, з того вшыткы условії на номінацію сповняло 15.
На засїданю крайского парламенту пряшівскы посланцї вырїшыли, же трёма лавреатами тогорічной Цїны ПСК стануть умелецькый скулптор Ян Лесняк, камераман і режісер Ладіслав Чікі in memoriam, і вызначный русиньскый неврохірурґ Юрій Штенё. Штеня на Цїну ПСК номіновав віцежупан Мартін Якубов.
Цїну дістане за вынятковы довгорічны заслугы і вызначный одборный вклад до розвитку неврохірурґії на Словакії і в загранічу.
Ладіслав Чікі, котрый вмер лем тот рік по довшій хворотї, так само є знамый Русинам на Словакії, бо десяткы років, окрем іншого, приготовлёвав у Словацькій телевізії, пак в Радію і телевізії Словакії Русиньскый маґазін.
Юрій Штенё
Проф. МУДр. Юрій Штенё, др. н. (р. 1948) є родаком з русиньского села Кленова, Сниньского окресу. Є цїлосвітово познатым і узнаваным неврохірурґом. Цїлый жывот присвятив тій дісціплінї як доктор і науковый робітник.
У своїй довгій карьєрї го можеме знати і на вызначных функціях – як декана Лїкарьской факулты Універзіты Коменьского в Братїславі ці довгорічного предносту Неврохірурґічной клінікы Лїкарьской факулты Універзіты Коменьского. Выпрацовав методу мапованя нервовых драг електрічнов стімулаціёв почас мікрохірурґічных операцій мозґу. Выпрацовав і класіфікацію туморів мозґу, котра є цїлосвітово прията. Є автором дакілько сто одборных публікацій і дакілько сто лекцій по цїлім світї.
В роцї 2007 Юрія Штеня презідент Словацькой републікы Іван Ґашпаровіч оцїнив Прибиновым крестом І. класы за розвиток неврохірурґії.
Як єдному із найвызначнїшых одборників у области неврохірурґії, деканови Лїкарьской факулты і бывшому предностови Неврохірурґічной клінікы му было у 2018-ім році удїлене оцініня Крішталёве крыло.
Быв оцїненый і Честным узнанём Сівтовой федерації неврохірурґічных обществ за розвиток неврохірурґії на благо людства. У 2015-ім роцї быв зарахованый меджі 16 найвызначнішых неврохірурґів на світї.
Найвысшы крайскы оцїнїня ПСК ся будуть лавреатам передавати в рамках ґалапроґраму в децембрї на Великій сцені Театру Йонаша Заборьского в Пряшові.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
