19. 11. 2022: В русиньскім совіті найвеце мандатів здобыв список Русины вєдно

Появили ся і аномалії.

17-го новембра 2022-го року сербска Републікова волебна комісія публіковала резултаты меншыновых волеб, котры проходили в недїлю 13-го новембра. Народностны меншыны собі в них выберали новый склад своїх націоналных совітів.

Новый склад совіту голосованём выберали і Русины. Як інформовала аґентура Рутенпрес, в офіціалных документах ку вобам ся пише, же. в списку русиньской народностной меншыны было записаных 7 247 людей з правом голосовати Голосовати пришло 3627 людей, значіть участь была 50 процент. Русины голосовали довєдна на 188 місцях.

Русины вєдно выграли і посилнили мандаты

До Націоналного совіту Русинів, орґану русиньской народностной самосправы, кандідовало тот рік пять кандідачных списків. Тот рік вшыткы спискы здобыли мандаты. Перед штирёма роками, коли было піднятых сім списків, мандаты роздїлило собі лем шість з них.

Єднозначным вітязом знова став список Русины вєдно, як і штири рокы тому, котрый здобыв 1 690 голосів і в новім складї Націоналного совіту Русинів буде мати 10 мандатів. Хоць здобыв лем дашто понад 23 процент голосів, што є о 15 процент менше в порівнаню з попередніма вольбами, при новім розложіню сил буде мати о два мандаты веце як мав дотеперь.

Список Вєдно за Войводину – ОЛЕНА ПАПУҐА буде в совіті знова з двома мандатами, котры мав і дотеперь, хоць перед штирёма роками тот кандідачный список ішов під назвов Быти і зістати Русином – Олена Папуґа. Тот рік список Олены Папуґы дістав 474 голосів.

442 голосів здобыв список Русиньска будучность, што му в новім совіті забезпечіло так само два мандаты. І Русиньска будучность зіставать з єднакым чіслом мандатів, кедьже дві кресла належали тому списку і дотеперь.

Погіршыв собі список За Русинів – Желько Ковач. Покля штири рокы тому у вольбах здобыв три мандаты, в новім складі совіту уж буде мати лем двох представителїв. Список здобыв у выборах 481 голосів.

Руска матка за Русинів, кандідачный список, котрый підняла членьска орґанізація Світового конґресу Русинів – Руска матка, пересвідчів 492 людей, котры му дали голос. Буде мати три мандаты і список з лідером проф. Михайлом Фейсом став другым найсилнїшым у выборах по Русины вєдно.

Выборчі „аномалії“

Хоць список Русины вєдно знова єднозначно переміг у выборах і другый найсилнїшый список, котрый підняла Руска матка, зохабив далеко за собов, вопросы выкликують дакотры „аномалії“, котры при вольбах были.

Таков аномаліёв є голосованя в Дюрдёві, де 448 голосів здобыв список Русины вєдно і 42 голосів мала Русиньска будучность. Далшы три кандідачны спискы не здобыли ани єден голос. Запис містной волебной комісії з голосованя публіковала на соціалній сітї лідерка списку Вєдно за Войводину – ОЛЕНА ПАПУҐА. Люди на профілї Папуґы в повязаню з публікованым записом выражали похыбности о транспарентности волеб.

Олена Папуґа ся такой 14-го новембра звернула писмом до Републіковой выборчой комісії, жебы тота, як головный орґан у выборах, перевірила резултаты з Дюрдьова.

Як ся голосовало в окремых місцях

Без огляду на резултаты в Дюрдёві, посмотриме ся і на далшы місця, де ся голосовало, жебы відїти, де мав переможця выборів, список Русины вєдно, найвекшу підпору.

В Шідї тот список здобыв 73,96 процента. В споминанім Дюрдёві то было 91 процент голосів. В Коцурї домашнїй Михайло Фейса не переміг, із своїм списком скінчів другый, але найуспішнїшы там не были ани Русины вєдно, котры скінчіли аж третї. Найвеце голосів там здобыла Русиньска будучность.

Головный центер войводиньскых Русинів – Руськый Керестур, так само голосовав найвеце за список Русины вєдно. Мав там 48,89 процента голосів.

Список Вєдно за Войводину – ОЛЕНА ПАПУҐА переміг у Вербасї, такой за ним была Руска матка, а Русины вєдно там здобыли аж третє місце. Олена Папуґа выграла і выборы в століцї Войводины – Новім Саді. Цїлковый

переможця Русины вєдно быв у Новім Садї декласованый і сінчів аж на четвертім місцї.

Силный мандат здобыв список Русины вєдно в Кулї, де мав 72,53 процента голосів і далшы кандідачны спискы зохабив далеко за собов.

Петро МЕДВІДЬ. Ґрафічна і языкова коректура: АРК в СР. Фото: Рутенпрес.