19. 3. 2024: В Новім Садї одбыв ся фестівал новой співанкы Ружова заградка

34-ый рочник Фестівалу новой русиньской співанкы Ружова заградка одбыв ся в недїлю, 17-го марца 2024-го року, на Великій сценї Йован Дёрдєвіч Сербского народного театру в Новім Садї. Інформовала о тім аґентура Рутенпрес.

Фестівал быв орґанізованый Радіом і телевізіёв Войводины (РТВ), з окремым анґажованём русиньскых редакцій у радію і телевізії а Музичной редакції РТВ. Войводиньске радіо і телевізія з події робили і прямый ефір.

Кедьже іде о конкурзный фестівал авторьской співанкы, найлїпшы композіції выберала собі публіка, як і пятьчленна одборна журї.

На тогорочнім фестівалї Ружова заградка было одпрезентованых 15 новых русиньскых композіцій. Публіка за найлїпшу співанку выбрала Мир там це чека, котрой текст написала Ася Папуґа і музику скомнпоновав Александар Човс. Інтерпретовала єй на фестівалї Таніта Ходак Планчак.

Журї выбрала за найлїпшу композіцію співанку Пяти бок швета, котрой музику скомпоновала Татяня Колєсар Ґвоіч на текст Мірославы Даждіу, і інтерпретовала єй Мірела Тімко. На другім місцї скінчіла вже споминана співанка Мир там це чека, а третє місце припало композіції з назвов Гвиздочка.

Співанка Пяти бок швета здобыла од журї і нагороду за найлїпшый текст, оцїнїня за найлїпшый аранжман здобыв Ервін Малина за тоту саму співанку. Оцїнїня за найлїпшу інтерпретацію дістала Татяна Яшко, котра співала співанку Гвиздочка.

В рамках тогорочного фестівалу Ружова заградка публіка мала так само нагоду припомянути собі дакотры із найкрасшых співанок, котры про фестівал свого часу написали вже покійны Владислав Надьмитро і Михал Лікар, авторы, котрых творчость овпливнила многы із попереднїх рочників фестівалу.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Рутенпрес