19. 4. 2023: Буде мож обзерати, як проходит консервация образу Варголя

Музей Енді Варголя в Пітсбурґу остал єдным з бенефіциєнтів Bank of America 2023 Art Conservation Project Grant.

Дофінансуваня буде схоснуване, жебы провести консервацию образів Варголя з сериі Oxidation. Зроблят і хімічну анализу колекциі, жебы рішыти ідеальны условія експонуваня і триманя тых образів.

«Роботы Варголя з сериі Oxidation, што маме іх в нашій колекциі, становлят консервацийне вызваня» – повіл Патрік Мур, дуректор музею. «Гойніст Банку Америкы дозволит рішыти долготерміновы стандарды опікы над тыма образами» – дополнил.

Консерваторскы роботы на найвекшым образі з сериі Oxidation будут проходити в самій ґалериі, приходяча публика буде могла видіти цілый процес. Додатково на місци будут до почытаня материялы поясняючы штуку консервациі образу.

«То барз атракцийна способніст для Музею Варголя, жебы показати важну роботу, што ся робит найчастійше за запертыма дверми, без доступу осіб з зовни» – оповідат Амбер Морґан, директорка до справ колекциі і выстав. «Одвиджаючы будут мати можніст видіти, як штука і наука лучат ся, жебы сме пак знали, што рішати в справі переховуваня, презентуваня і трактуваня елементів нашой колекциі» – стверджат А. Морґан.

Bank of America’s Art Conservation Project од 2010 рока підперат охорону образів, різб ци археолоґічных творів о стратеґічным значыню для культуровой спадковины і істориі штукы. Веце як 237 проєктів з 40 держав веденых нон-профітовыма орґанізациями достало дофінансуваня на консервацию історичні ци культурово важных творів штукы, котрым горозит знищыня.

Наталія МАЛЕЦКА-НОВАК, ЛЕМ.фм.

(Публікуєме в оріґіналї – лемківскім варіантї русиньского языка.)