19. 5. 2023: Людміла ШАНДАЛОВА: У Карпатах, Осїннїй час (Стишкы)

Людміла Шандалова

У Карпатах

Як ся сонце низко клонить,

думам на тя, мамко добра

твоя ласка із долонї

як пречістый святый образ

 

Як заспівать пташок зрана

на мысли мі нянько нинї

ёго коса наклепана

косить траву на долинї

 

Шумить вітер в шырім полю

памятам на хыжу давну

на Карпаты, мою долю

в краю любім, мою страну

 

 Осїннїй час 

Осїнь у брудных млаках шлюпоче

листопад панує, лїто уж не хоче

стромы ся потрясли, затихли звечера

з конарїв по єден листочок зазерать

 

Ранїшнї гмлы ся звалили до долины

не грає маленький сверечок на поли

нашли сі пташата притулок на югу

давно їх шумный спів, давно уж не чую

 

Росити із неба потихы зачало

до ниткы послїднёй душу мі змачало

лавочка самотня чекать нас за рогом

із вірной любови остало не много

 

Осїнь ся бродить улицёв студенов

на плечі цаністра зо слизов не єднов

не грїє, не палить, бо вшытко застило

як туга мілого за ёго премілов