19. 6. 2020: Уповномоченый про меншыны у міністра школства

В середу, 17-го юна 2020-го року, уповномоченый влады Словацькой републікы Ласло Буковскый (на фотцї) продовжовав у робочіх стрїчах з членами новой влады приятём у міністра школства Бранїслава Ґрeлінґа.

Буковскый (на фотцї) уж в маї абсолвовав робочі стрїчі з міністерков справодливости Маріёв Коликовов, і міністерков културы Наталіёєв Мілановов. О їднанях на резортї школства інформовав офіціалный сайт ёго уряду.

За участи державной таёмнічкы Міністерства школства, наукы, баданя і шпорту Монікы Філіповой (на фотцї) і ґенералной директоркы Секції народностной і інклузівной освіты Монікы Ґайдачовой, было за інформаціями сайту продіскутованых веце тем, котры дотуляють ся выховы і освіты дїтей – членів народностных меншын, і взаємной сполупраці.

Філіпова, котра кандідовала у вольбах на списку партії Sloboda a Solidarita, была і співавторков части партійного проґраму, яка занимала ся політіков односно народностных меншын. Части того проґраму дістали ся і до Проґрамового выголошіня влады Словацькой републікы, в котрім ся конкретно споминать і русиньске школство.

Участны ся на стрїчі договорили передовшыткым на сполупраці при повнїню конкретных задач, котры з Проґрамового выголошіня выходять, наприклад, творїня закона о народностнім школстві і закона о поставлїню народностных меншын, але і з Акчного плану охороны прав особ, котры належать ку народностным меншынам і етнічным ґрупам.

Буковскый звернув увагу і на проблему при становлёваню кількости школярїв першых клас при меншыновых середнїх одборных школах і ґімназіях. На другім боцї підкреслив важность приятя леґіслатівных рїшінь народностного школства, як ї досягнены успіхы.

„Вітам конштруктівного і одкрытого духа, в котрім робоча стрїча проходила і вірю, же ся сотворив простор про єфектівну сполупрацу при повнїню сполочных цїлїв,“ повів по робочій стрїчі уповномоченый Буковскый.

Петро МЕДВІДЬ, лем.фм, языкова управа: ред. АРК в СР.