19. 8. 2023: Председом Світовой рады Русинів і далшы два рокы буде Штефан Лявинець. Делеґаты схвалили великый ерб

В суботу, 19-го авґуста 2023-го року, продовжовав у Новім Садї XVII. Світовый конґрес Русинів, котрый мав на проґрамі ІІ. і ІІІ. пленарне засїданя. На далшы два рокы буде у функції председы Світовой рады Русинів як выконного орґану Світового конґресу Русинів – Штефан Лявинець.

Робочій день почав тым, же председове окремых конґресовых комісії поінформовали о своїх засіданях, котры проходили день перед тым, а так само о робочіх планах на далшый дворочный меджіконґресовый період.

Делеґаты дістали і інформацію о пятніцёвім засїданю Світового форуму русиньской молодежі. Форум собі выбрав нову председкыню, котров стала Светлана Бойчук з Румунії. Авотматічно нова председкына молодежного форуму стала і новов членков Світовой рады Русинів.

В кутрій оцїнцї засїданя форуму Светлана Бойчук высловила охоту актівно робити в рамках той платформы в слїдуючім періодї.

Русины мають великый ерб

На XVII. Світовім конґресї Русинів схвалили делеґаты і великый, святочный ерб. Інформацію о можности схвалити собі великый ерб дістали делеґати в рамках інформації о засїданю історічной комісії.

Гералдіка – флаґ і ерб, зістали єднакы як дотеперь, была лем офіціално схвалена можность хосновати великый ерб при святочных подїях, як і при репрезентації у вонкашнїх односинах (комунікація з европскыма інштітуаціями ітд.).

Пропозіцію великого ербу зробив Мілан Ян Піліп, делеґат конґресу за Словацьку републіку, котрый гералдіков, в тім чіслї русиньсков, занимать ся довгы рокы, і у 2014-ім роцї выдав триязычну публікацію з назвов Русиньска народна сімболіка. Пропозіція великого ербу была проїднана на засїданю історічной комісії, в першый день конґресу, а так само на засїданю Світовой рады Русинів в тот самый день.
Великый ерб быв схваленый почас ІІ. пленарного засїданя великов векшынов голосів. Великый ерб є твореный малым ербом і є доповненый о далшы мімощітовы знакы з природным мотівом, котры выражають Карпаты, їх фавну і флору. Носителями щіта суть традічны карпатьскы звірї – медвідь і вовк, стоячі на буковім підставцї, котрый зясь сімболізує карпатьскы буковы пралїсы. Під щітом ся вине пантлик з геслом, котре творять початочны слова русиньской гімны Я РУСИНЪ БЫЛЪ, ЕСМЬ, И БУДУ, похаджаючі з поезії Вручаніє од Александра Духновіча. Слова на пантлику суть написаны автентічнов ґраматіков так, як вышли в алманасї Поздравленіє русинов на год 1851 от літературного заведенія Пряшовскаго, котре упорядковав Александер Духновіч.

Председом СРР зістав Лявинець

ІІ. пленарне засїданя продовжовало голосованём о новім складї Світовой рады Русинів і о новім председови Світовой рады Русинів, яка є выконным орґаном Світового конґресу Русинів меджі двома засїданями СКР.

На пропозіції делеґацій за окремы членьскы державы были до Світовой рады Русинів голосованём делеґатів выбраны – Юрій Капац за Чеську републіку, Андрій Трохановскый за Польщу, Штефан Лявинець за Мадярьско, Міё Шайтош за Хорватію, Ґеорґій Фірцак за Румунію, Михайло Фейса за Сербію, Мартін Караш за Словакію, Микола Бобинець за Україну, і Павел Роберт Маґочій за Северну Америку.

Маґочій быв до Світовой рады Русинів выбраный дочано, покля ся не вырїшыть о новім членові Світовой рады. Причінов было, же делеґація зо Северной Америкы тот рік не мала жадно іншого представителя на СКР, окрем Маґочія.

Як сьме спомянули высше, членом СРР є і председкыня Світового форуму русиньской молодежі Светлана Бойчук. Новых членів так має молодежный форум, Чеська републіка і Сербія.

Світова рада Русинів номіновала за свого председу Штефана Лявинця. Жадна інша номінація ани кандідатура не была оголошена. Делеґаты продовжыли мандат на далшы два рокы Штефанови Лявинцёви з тым, же за старонового председу голосовали вшыткы присутны делеґаты, нихто не быв проти, а нихто ся ани не стримав голосованя.

Секретарём Світовой рады Русинів зістав Володимір Противняк, якого собі зволила рада. Підпредседами Світовой рады Русинів суть на далшый дворічный період Мартін Караш і Ґеорґій Фірцак. Прес-секретарём СРР зіставать Петро Медвідь.

Далшый конґрес буде в Букурештї

Выбраня Ґеорґія Фірцака за єдного з підпреседів рады має і свою важну причіну. Світова рада Русинів схвалила, же XVIIІ. Світовый конґрес Русинів одбуде ся в главнім містї Румунії – в Букурештї. Конґрес у 2025-ім роцї буде проходити в просторах румуньского парламенту.

Делеґаты XVII. Світового конґресу Русинів в рамках ІІІ. пленарного засїданя прияли і офіціалну резолуцію, котру будеме публіковати окремо.

Підписав ся меморандум

Председове членьскых орґанізацій на кінцю конґресовых засїдань підписали Меморандум о довгодобій сполупраці .

„Основным цїлём Меморандума о довгодобій сполупраці членьскых орґанізацій Світового конґресу Русинів є декларація сполупраці на меджінародній уровни і потверджіня взаємной коордінації, при просаджованю сполочных цїлїв выходячіх із Станов обчаньского здружіня Світовый конґрес Русинів, одкликуючі ся на меджінародны документы як Рамковый договор Рады Европы на охрану народностных меншын, Европска харта меншыновых або реґіоналных языків, Копенгаґеньскы крітерії вступу до ЕУ, Меджінародный пакт о обчаньскых і політічных правах, Европскый договор о людьскых правах і далшы,“ пише ся в преамбулї меморандума.

Цїлём меморандума є, жебы сполупраца членьскых орґанізацій была іщі тїснїша, і жебы конґрес, зареґістрованый на Словакії, мав потвердженый імідж і поставлїня меджінародной орґанізації, што є про СКР важным при їднаню з европскыма інштітуціями і орґанізаціями.

Меморандум о довгодобій сполупраці став підписанём частёв Станов Світового конґресу Русинів.

Петро МЕДВІДЬ, прес-секретарь Світовой рады Русинів. Ґрафічна і языкова управа: АРК в СР

Здрой: ЛЕМ.фм