2. 3. 2022: В Коцурї одпрезентовали русиньскы книжкы. Фейса кандідує на председу Руской маткы

В недїлю, 27-го фебруара 2022-го року, одбыло ся засїданя Містной орґанізації Руской маткы в Коцурї, в Сербії, інформовала аґентура Рутенпрес.

На засїданю обговорили ся заключіня із засїданя Світовой рады Русинів, котре одбыло ся попереднїй день в румуньскім Переґу Маре. Професор Михайло Фейса так само говорив о резултатах із навщівы Інштітуту русиньского языка і културы Пряшівской універзіты в Пряшові ці о рихтованю презнтацій книжкы Мала історія Русинів од Івана Попа, яка лем недавно вышла і у войводиньскій варіантї русиньского языка.

Фейса участным представив і найновішы публікації Русинів карпатьского реґіону. На порихтованій выставі было коло 70 книжок, што представлює третину із вшыткых публікацій, якы Фейса принїс із пряшівского інштітуту, і мають быти подарованы русиньскій ґімназії в Руськім Керестурї, як і оддїлїню русиністікы на Універзітї в Новім Садї. Суть то книжкы, котры были публікованы за остатнї дві десяткы років.

На стрїчі обговорило ся і то, же Містна орґанізація Руской маткы буде на выборчій громадї той орґанізації, яка одбуде ся 5-го марца того року в Руськім Керестурї, пропоновати за нового председу якраз Михайла Фейсу. Фейса бы в припадї ёго выбратя вычеряв на тій посадї довгорочного председу Дюра Папуґу, котрый быв даякый час і председом Світовой рады Русинів, теперь є членом рады за Сербію.

Кандідатура Фейсы ся дала очековати. З тым, же стане новым председом орґанізації, ся раховало уж на остатнїм Світовім конґресї Русинів, котрый у 2021-ім роцї одбыв ся в польскій Криніцї. Фейса втогды міг за Руску матку стати і членом Світовой рады Русинів, но їх делеґація втогды рїшыла, же в радїі за Сербію зістане Дюра Папуґа, покля іщі є председом домашнёй орґанізації.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: РутенпреС.