2. 8. 2022: На ватрі в Михалові збадают DNA Лемків

Старчыт пробка слины. Перед баданьом не мож істи, пити ци курити 30 минут. Пак каждый участник отримат результаты тыкаючы свого походжыня. Дослідникы будут зберати пробкы вчас 42. Лемківской Ватры на Чужыні, в надходячый вікенд 5.-6. серпня/авґуста тр.

Проєкт реализує Інститут Біоорґанічной Хіміі Польской Академіі Наук (PAN) та Познаньска Політехніка. Закладат він зосеквенцийонуваня ґеномів 5000 жытелів Польщы. З того возникне Ґеномічна Мапа Польщы, значыт мапа ґенетичной змінности, што становила буде ґенетичный образ жытелів польской державы.

Ґенетичный рапорт о походжыню

В будучности послужыт як стандард в ґеномічных, ґенетичных ци біомедичных баданях веденых для популяциі Польщы. Вшыткы діяня в проєкті ведены сут з рекомендацийом біоетичных комісий.

Жебы Ґеномічна Мапа Польщы оддавала реальный, вельоетнічный характер державы, в проєкті заплянували секвенцийонуваня 1000 ґеномів представників выбраных реґіональных, етнічных і нацийональных меншын. Дослідникы побрали уж пробкы од Кашебів і Шлезаків.

Становиско попри ЛЕМ.FM

Каждый, хто буде мал охоту взяти участ в проєкті, буде мусіл выполнити коротку анкєту, в котрій звідувати будут м.ін. о нацийональну ци етнічну приналежніст, о тото, ци плекат традициі і інче, а тіж оддати пробку слины, з котрой выізолюют DNA. Побераня слины буде проходило безінвазийні, єст безпечне для баданого.

Пробкы DNA, взяты зо слины, побераны будут дармо, а кажда особа отримат дрібницьовый рапорт з інформациями, одкале походили єй ґенетичны предкы, напр. з якой части Европы. Подібны баданя мож зробити в приватных осередках, але іх кошт то пару, а аж і парунадцет тисячы злотых.

Становиско дослідників буде ся находиlo обік радийового шатра ЛЕМ.фм.

Наталія МАЛЕЦКА-НОВАК, ЛЕМ.фм.

(Публікуєме в оріґіналї – лемківскім варіантї русиньского языка.)