2. 8. 2022: Традічны ремесла, природа і русиньскый темперамент. Обявте Полонины вже третїй раз
Унікатный зажытковый вікенд в русиньскых Полонинах на Словакії вже став лїтнёв традіціёв. Почас третёго авґустового вікенду 2022-го року на навщівників Народного парку Полонины чекають облюблены ремеселны зажыткы.
Выроба керамікы, тканя, робота з деревом ці прутём, но і печіня хлїба. То лем часть того, што оголошають орґанізаторы 3-го рочника події з назвов Обявте Полонины. Любителї природы будуть годны навщівити карпатьскы пралїсы, а то нелем почас дня, але і в ночі, припадно позоровати міліоны звізд в Парку темного неба.
Актівности у вісем селах
Тогорічна подїя Обявте Полонины одбуде ся в днях 19-го аж 21-го авґуста 2022 р., проходити буде в трёх полониньскых долипнах.
„У тім роцї будуть актівности роздїлены до вісем сел окресу Снина – Стащін, Ладомирів, Пчолине, Тополя, Рунина, Влыч (Уліч), Кривый (Уліч Кривый) і Новоселіця,“ інформовала орґанізаторка Ева Коцанова з обчаньского здружіня Таке наше.
Блудиско в коноплї і трактор
Ку пятьдесятём унікатным зажыткам про дїти і дорослых прибудуть знова і новоты. Наприклад коноплї – єден з новых зажытків, принесе до увагы навщівників тоту інтересну рослину, котра має шыроке выужытя. Якраз коноплї даколи традічно належала ку Полонинам.
„Хоць на ню дакус призабило ся, може веце людей бы іщі нашло на повалї старе полотно з конопель або лену, припадно облечіня. На фармі в Пчолинім навщівници дізнають ся о плеканю, оброблїню коноплї, дїти докінця будуть годны стратити ся в блудиску з конопель, або ся повозити на тракторї,“ описує проґрам Коцанова.
У хыжцї Дїдка Вечернічка в Новоселіцї будуть дїти годны зажыти русиньскы співанкы і танцї, но і інтересны ручны роботы повязаны із звірятами. Русиньскы крої, співы, музика, вышывкы, но передовшыткым русиньска натура і гумор будуть творити унікатну атмосферу покоя і сполуналежности.
Чісло навщівників росте
„Нашы зажыткы переведуть навщівників дакілько селами повязаныма з традічныма ремеслами, русиньскым темпераментном і недотуленов природов. Надвяжеме на попереднї рочникы, котры принесли множество забавы, людьскых стрїч і позітівной енерґії,“ доповника Катарина Романова, співорґанізаторка події.
Зажытковый вікенд выникнув на підпору необявленого реґіону Полонин у 2020-ім роцї. Кількость навщівників за рік двократно наросла. Інтересный проґрам влони пришло спробовати понад 800 людей із вшыткых частей Словакії, а были і навщівници зо заграніча.
Навщівници оцїнюють покій, родинну атмосферу, прекрасну природу, можливость спробовати собі ремесла, а облюблены суть і романтічны ночны зажыткы при позорованю звізд.
Полонины ся вам дістануть під скору
Подія Обявте Полонины є файнов принагодов спознати тот про многых іщі все необявленый куточок Словакії.
І орґанізаторка Ева Коцанова, котра є з Кошыць, лем перед пару роками Полонины обявила. Не крыє надхенаня з того реґіону. Подля Коцановой почас події можете дістати Полонины, їх пахоту, смак, фарбы і гумор під скору. І то вшытко в прекрасній природї, із щірыма людми, автентічно і по русиньскы.
Подїя уж на вакаційній мапі
Лїтню вікендову подію орґанізує обчаньске здружіня Таке наше, котре было основане на підпору турістічного руху і реґіоналного розвитку на выходній Словакії.
Подля Коцановой повнить свій замір. „Подїя Обявте Полонины собі нашла своє місце на вакаційній мапі Словакії. Їй унікатность є у створїню інтімного споїня меджі навщівниками і містныма жытелями. Не іде лем о ремеселны варштаты. Участны мають достаточный простор побісїдовати, дїлити ся о свої радости жывота ці скушености. Збогачують ся взаємно, і то є тото найкрасше, што людей тїгать на Обявте Полонины.“
Тот рік проєкт підпорили партнеты, котры актівно беруть на подїї участь. Меджі нима є Народный парк Полонины, Словацькый союз астрономів і Словацьке астрономічне общество при Словацькій академії наук, Фундація Словацького ґазового промыслу, Пряшівскый самосправный край, Радіо і телевізія Словакії а Областна орґанізація турістічного руху Вышній Земплін.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
