20. 1. 2023: До музея Варгола затїкать. Часть творів ішла до депозіту

Намісто реконштруцкії рїшають гаварію.

Музей модерного уменя Енді Варгола в Меджілабірцях актуално рїшыть проблему із затікаючов стрїхов. Як інформовала аґентура TASR, часть творів з єдной експозіції мусили перенести до депозіту, зостаток выставлюють в части музея, котра служыла на вымінны выставы.

Варголів музей мав притім уж давно реалізовати велику реконштрукцію, на котру грошы приобіцяла іщі влада Петра Пеллеґріні. Но дотеперь ся з фінанчных причін з роботами не зачало.

Музей на два тыждні заперли

„Перед Рождеством накурило снїгу і по наслїднім отеплїню сьме збачіли затїканя воды в части сталой експозіції творів Енді Варгола. Приблизно 60 творів сьме перенесли до депозітаря, де суть про них створены добры условії з наставленов оптімалнов теплотов і вогкостёв. Дакілько творів сьме пізнїше переіншталовали до резервной выставной салы в рамках музея,“ повіла про аґентуру заступнічка директора музея Івета Русинкова.

Перенесены творы суть за їй словами в стопроцентнім ставі. Музей быв коло двох тыжднїв з технічных причін запертый. Затїканя продовжує доднесь. Музей вже є одкрытый, але має управлене вступне.

„Часть сталой експозіції, котра є в гаврійнім ставі, і над котров є пошкоджена стрїха, і далше про людей є заперта,“ повіла Русинкова з тым, же творы, котры суть наіншталованы в далшій части спомянутой сталой експозіції, не суть засягнуты гаварійным станом, і суть в порядку. Не пошкодив ся ани жаден з творів, кедже їх достаточно скоро перенесли.

Подля слов Мартіна Цубяка, директора музея, о затеканю ся зробила записніця а іщі перед Рождеством інформовали о проблемі і зряджователя музея, котрым є Пряшівскый самосправный край. Стрїха остатнїй раз реконштруовала ся в роцї 2010.

Цїлково є в музею приблизно 200 творів, коло 75 процент з них є пожыченых од пріватных властників.

Реконштрукція одложена

На велику реконштрукцію єдиного музея свого тіпу в Европі, і єдного з двох на світї, выдїлила грошы іщі влада Петра Пеллеґріні на своїм выїздовім засїданю в Кежмарку в октобрї 2019-го року в цїлковій сумі 7,1 міліона евр.

Но почас робліня проєктовой документації, вдяка роснутю цїн на ставебнім рынку, підняли ся інвестічны вытраты проєкту о майже 80 процент, значіть на веце як 12,7 міліона евр.

Перебудова мала принести розшырїня ґалерії а депозіту, выникнути мали новы ательєры, прибыти мали інтерактівны елементы, в планах быв і простор про освітнї проґрамы. Просторы ся подля проєкту мали розшырити о три штокы, чім мав выникнути простор про розлічны конференції, мултімедіалны презентації, малы сценічны формы ці бісїды. На стрїсі ся раховало з оддыховов зонов у формі амфітеатру.

Пряшівскый самосправный край мав діставати грошы в трёх транжах. Пришли першы дві і пак в юли 2022-го року словацька влада хотїла зрушыти цїле узнесїня о фінанцованю реконштрукції музея найславнїшого Русина. То ся наконець не стало, узнесїня зістало платне. Їднаня о реконштруцкії і дофінанцованю робот тырвають.

Автор фотоґрафії: Ян Штовка, MQEP. Петро МЕДВІДЬ, ЛЕМ.фм. Ґрафічна і языкова коректура: АРК в СР.