20. 10. 2017: Чірч здобыв дві оцїнїня в цїлословацькім конкурзї

19-го октобра 2017-го року проходило святочне передаваня оцїнїнь селам, котры ся запоїли до конкурзу Село рока 2017 (Dedina roka 2017). Оцїнїня представителям успішных сел вручав міністер жывотного оточіня Словацькой републікы Ласло Шоймош в Оравскій Полгорї.

 

Святочне передаваня оцїнїнь было зорґанізоване в смыслї конкурзных условій і правил селом, котре было цїлковым вітязом і орґанізатором конкурзу Словацьков аґентуров жывотного оточіня. Хоць цїлковым вітязом конкурзу Село рока 2017 стала ся Оравска Полгора, успішный быв і русиньскый Чірч, котрого староста Михал Дїдик привіз домів такой дві оцїнїня.

Чірч, котрый ся до конкурзу приголосив першыраз, быв оцїненый в катеґорії Село як партнер, а перше місце село дістало і в інтернетовім голосованю людей.

 

„Дякую вшыткым нашым співобчанам за вшытко, же наше село просперує і видиме, же ідеме правилным напрямом. Іщі раз велика подяка і тым, котры нам посылали голосы,“ інформовав на совїм профілї на сітї Facebook староста Дїдик.

 

Конкруз Село рока проходив вже по девятый раз. Тот рік ся до нёго запоїло двадцять сел із цїілой Словакії, котры собі зміряли силы в презентації резултатів досягненых коло їх обновы і розвитку. Цїлём конкурзу є презентація красы, унікатности і успіхів сел, підниманя знань обчаньской сполочности о вартости країны, но і підниманя конкуренціїспособности сел на Словакії.

Конкурз быв выголошеный Міністерством жывотного оточіня Словацькой републікы, Словацьков аґентуров жывотного оточіня, Обществом про обнову села і Здружінём міст і сел Словакії.

Жрідло фотоґрафії: Михал Дїдик

П. М.