20. 10. 2022: Lemko Hall і його Лемківскій Кєрмеш. Подія уж в найблизшу неділю

Йонкерс не лем в минулости был сильным лемківскым осередком за великом млаком, але такым він остає і днес. Єст так за справом парох одданых діячів, якы хотят продолжати добру традицию лемківской еміґрациі.

Єдном з ініциятив, што пару років тому реактивувала ґрупа лемківскых діячів, якій проводит Андрий Медвід, єст орґанізуваный каждого рока Лемківскій Кєрмеш в Йонкерс (штат Ню Йорк).

І того рока подія одбуде ся осінньом пором. Уж в найблизшу неділю, 23. жолтня/октобра, прожываючы головно в штаті Ню Йорк Лемкы зыйдут ся святкувати, а при тым бавити. О тым інформує нашу редакцию як раз родак зо Ждыні, Андрий Медвід, якій уж вельократно приносил нам інформациі о культурным жытю Лемків на східнім берегу ЗША.

«Кєрмеш буде тырвал од третьой до семой годины пополудни. Запрашам вшыткых. Будеме мати нагоду стрітити ся в нашій лемківскій родині» – реляцийонує Медвід. «З причыны того, же сме розшмарены по цілым світі як ядра маку, буде то неможливе [жебы сме ся вшыткы стрітили – прип. ред.], лем прошу вас, будте хоц думком з нами, а духом будеме разом».

Орґанізатор радіє, што завдякы лемківскым медиям вшыткы по цілым світі можеме ся віртуально чути і быти разом на того рода подіях. Вступне є платне, але в його рамках буде жыва русиньска музика од ґрупы Lem Joy Trio.

Йонкерс і його околиці являют ся по днес великым скуписком русиньской еміґрациі. То там на зламі XIX і ХХ ст. родила ся лемківска діяльніст серед товдышньой інтеліґенциі. Топонім Йонкерс в Старым Краю тямит ся як раз з Американьскым Карпаторускым Центром Lemko Hall, якій по роках постепенно одраджат свою діяльніст.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)