20. 10. 2022: ТАД одпремєрує Жобрацьку оперу

В пятніцю, 21-го октобра 2022-го року, в Театрї Александра Духновіча в Пряшові на Великій сценї одбуде ся перша премєра в тій театралній сезонї. Театер свій репертоар збогатить о Жобрацьку оперу, котру режійно приготовив Каміл Жішка.

Жобрацька опера як комедія анґліцького драматурґа Джона Ґея была написана як пародія на великы оперы знаных театралных сцен, котра здобыла величезный успіх. В інсценації русиньского театру ілуструють оперету в середовиску злочінцїв як ундерґравндовый кабарет, де ся Мекіт званый Капітан, вождь банды бандітів і фраїркош, дістане до любовного трикутника.

Текст є іншпіратівный

По текстї анґліцького автора Джона Ґея театер сягнув зато, бо є іншпіратівный. „Жыє, є віталный. Первістно пародія на великы оперы мала уж при своїй премєрї у 1728-ім роцї великый успіх. І мы сягли по первістнім текстї,“ повів на пресконференції театру, котра одбыла ся 18-го октобра, режісер.

Назначів тым, же не преферовали адаптації той пєсы од Бертолда Брехта або Вацлава Гавла. „Окрем комедії, є то і сатіра жывота верьхных верств а змаганя двох служебниць одбывать ся в оточіню орґанізованого злочіну втогдышнёй добы. Дістав єм ся ку тексту, до которго маю повну довіру,“ підкреслив Жішка.

Головну роль має молодый актор

„Давно сьме так не грали, будеме відїти, як то прийме наша публіка. Реалізують ся молоды акторы, што співають,“ повіла Людмила Лукачікова, умелецька ведуча драматічного колектіву.

Головну роль Капітана дістав Володимір Рогач, представитель наймолодшой ґенерації акторів нашого професіоналного театру.

„Єм в ТАД пяту сезону і тота співанкова веселогра є новотов. В пєсї є доста композіцій і кажда має іншаку подобу, навеце рушать з історіёв пєсы. Моя роль є пестра, з ноблесов у каждім соціалнім середовиску, де ся знайде,“ сконштатовав Рогач.

Режісер Жішка робив і сценоґраґію а компоновав музику до інсценації. „В тім припадї ся мі музика на тексты в русиньскім языку компоновала добрї. Язык ня веде гармонічным напрямом,“ повів.

На сценї собі в пєсї Жобрацька опера заграть довєдна дванадцять членів драматічного колектіву, значіть ёго фундаментална часть. Переклад пєсы робив Валерій Купка. Жобрацька опера є у 77-ій сезонї театру за порядком ёго 390-ов премєров.

Петро МЕДВІДЬ, ЛЕМ.фм. Ґрафічна і языкова коректура: АРК в СР.