20. 11. 2022: ПСК підпорив реконштруцкію храмів, народных културных памяток

Оправили ся храмы в Шамбронї, Осаднім, Брезовічцї і Камюнцї.

Ґрантовый проґрам Пряшівского самосправного краю (ПСК) Вызва про реґіон уможнив реалізацію далшых проєктів заміряных на обнову обєктів памятковой вартости.

Край найновіше поміг сохранити народны културны памяткы в Шамбронї, Осаднім, Брезовічцї ці Камюнцї. На проєкты дав веце як 88 тісяч евр.

Як інформовало Оддїлїня комунікації і пропаґації ПСК, на теріторії краю ся вдяка крайскій самосправі зреалізовали далшы смыслуповны проєкты заміряны на обнову културных памяток. Окрем іншого і в селах Шамброн, Осадне, Брезовічка і Камюнка. Проєкты заміряны были на санацію і оправу веж памятковых обєктів, їх інтерьєру і просторів коло храмів.

ПСК дав грошы на тоты проєкты з Вызвы про реґіон, з проґраму Підпора обновы културных памяток UNESCO і народных културных памяток.

Народна културна памятка – Ґрекокатолицька церьков Покровы Пресвятой Богородіцї в Шамбронї із 1872-го року має выновлены муры. Роботы проходили почас лїта, край дав на реалізацію дотацію в сумі 20 тісяч евр.

Реконштрукціёв перешла і народна културна памятка – Православна церьков Вознесенія Господа в Осаднім з року 1930. Храм є знамый своёв унікатнов кріптов вояків з Першой світовой войны. Інтерьєр потребовав реконштрукцію. Розпис на стїнах ся механічно очістив, зафіксовав, наслїдно ся проблематічны пуклины выповнили інъєктажнов малтов. Зробила ся і сілікатова пенетрація а реновачне натертя. ПСК дав на проєкт 23 800 евр.

В Брезовічцї ся реалізовали роботы на народній културній памятцї – Римокатолицькім костелї святого Мартіна з Турс. Храм є з кінця 13-го столїтя. Вежа той оріґінално ґотічной будовы, котра в роцї 1713 барокізовала ся, перешла потребнов обновов. Уможнила то крайска дотація в сумі понад 24 600 евр.

Обновлена є і културна домінанта в селї Камюнка. На памятковім обєктї – Ґрекокатолицькій церькви святых апостолів Петра і Павла з року 1790, обновила ся фасада, але і інтерьєр. Роботы проходили і коло церькви а край на тот проєкт дав 20 тісяч евр.

Крайска самосправа у 2022-і роцї посередництвом Вызвы про реґіон і їй проґраму Підпора обновы културных памяток UNESCO і народных културных памяток підпорила 23 проєктів в цїлковій сумі 940 тісяч евр.

Петро МЕДВІДЬ, ЛЕМ.фм. Ґрафічна і языкова коректура: АРК в СР.