20. 1.2024: Рихтує ся друкована Інтерфийса. Унікатный проєкт

Выдавателям треба знати інтерес о дану публікацію. Підпорите?

23-го януара 2024-го року минуть точно три рокы, одколи до русиньского світа інтернету вступив вебсайт Інтерфийса. Стоять за ним двоми молоды русиньскы ентузіасты з Підкарпатя – Мигаль Лижечко і Петро Біров. З той нагоды рихтує ся друковный зборник із єднаков назвов.

Проєкт Інтерфийса – то некомерційный портал, „цїлём котрого є шырити новости і погляды, старати ся школовати людей у технолоґіях, хоснуючі нашу бісїду,“ дочітаме ся на порталї. Інтерфийсу Лыжечко з Біровом основали якраз на 10-ту рочніцю выникнутя русиньской языковой верзії сайту Wikipedia.

Од свого выникнутя портал Інтерфийса приносить статї з области технолоґічных новостей, популарной наукы, і є унікатным русиньскым проєктом што до той проблематікы.

І вдяка роботї двох запаленых Русинів із Підкарпатя мож знова раз пересвідчіти ся, же в русиньскім языку мож писати о вшыткім, чітати о вшыткім, а є лем на нас, жебы тот язык далше розвивали сьме у вшыткых областях.

В тых днях редакторы выголосили, же з нагоды третёй рочніцї основаня сайту рихтують про своїх чітателїв парадне святочне друковане выданя, в котрім будуть найлїпшы статї, якы были на порталї публікованы. А нелем то. В друкованім выданю чітателї найдуть і ексклузівны матеріалы, котры іщі на вебсайтї не были.

Як інформовав основатель і редактор порталу Інтерфийса Мигаль Лыжечко, котрый є, окрім іншого і познатый русиньскый ютюбер із псевдонімом Мигаль Кушницькый, вытрати на друкованя єдной книжкы будуть коло 7 евр. Половину грошей русиньскы актівісты хотять дати на дакотру фундацію, котра підпорить вояків, якы днесь мусять бранити країну атаковану аґресором.

Но жебы мож было дати зборник до друку, Інтерфийса потребує знати, кілько людей бы мало серьёзный інтерес о тоту публікацію.

Кедьже і наша редакція підтримує тоту актівность нашых підкарпатьскых Русинів, котры не мають жадной фінанчной підпоры, а роблять то лем позад свого ентузіазму і пересвідчіня, звертаме вашу увагу на можность записати ся меджі тых, котры бы дану публікацію хотіли мати. (Близшы інформації на вебсайтї ЛЕМ.фм.

Петро МЕДВІДЬ, ЛЕМ.фм, языкова і ґрафічна управа: АРК в СР.