20. 2. 2017: Новым председом ОСРС є Ян Липіньскый

В Пряшові в суботу 18-го фебруара проходило вже 21. засїданя Округлого стола Русинів Словеньска (ОСРС). Платформа, котра зъєдинять русиньскы професіоналны інштітуції, обчаньскы здружіня і незалежных актівістів, собі выберала нову презідію.

Новым председом ОСРС ся став Ян Липіньскый, котрый перевзяв веджіня по Міланови Піліпови. Тот зіставать членом презідії „ex offo“, кідьже є єднако як Липіньскый членом Выбору про народностны меншыны і етнічны ґрупы Рады влады Словацькой републікы за русиньску народностну меншыну. За індівідуалных членів быв до презідії выбратый Михал Секерак, староста села Баєрівцї, за інштітуції і орґанізації є од суботы членом презідії Осиф Ткач із Театру Александра Духновіча в Пряшові. Членами презідії і надалше зіставають Якуб Тулея, котрый быв потвердженый во функції секретаря ОСРС і Петро Медвідь во функції говорцю.

Платформа на своїм засїданю окрем іншого говорила о приготовлёваных подіях, котры ся мають одбыти в тім роцї в рамках Рока Адолфа Добряньского. ОСРС тот рік выголосив із нагоды 200-го юбілею од народжіня того вызначного русиньского будителя і першого посланця за Вышнє Угорьско в Угорьскім сеймі, де боёвав за права Русинів і Словаків.

Інж. Ян Липіньскый (1963 р.) ся народив в Крайній Порубцї в окресї Свідник. Є русиньскым актівістом, співоснователём Здружіня інтеліґенції Русинів Словеньска (1995) і Округлого стола Русинів Словеньска (2012). В роцї 1997 подав вєдно із Андріём Марчішіном успішну скаргу на Словацькый розглас за нерешпектованя прав Русинів в области народностного радіового высыланя. В роках 2003 – 2012 быв членом Справной рады Інштітуту памяти народа. Од 2011-го року є представителём Русинів во Выборї про народностны меншыны і етнічны ґрупы Рады влады Словацькой републікы. Є продуцентом документарных філмів заміряных на русиньску історію і особности Преосвященый... (Василь Гопко, блаженый Русин) (2008), Йосиф і його братя (2009) і Душы Карпат (2013). Так само є сполуавтором проєктів Чемериця, котры суть заміряны на підпору і охрану людьскых прав і народностных прав Русинів на Словакії. Жыє в Братїлаві.

Петро МЕДВІДЬ, пресовый говорця ОСРС

Веце інформацій: www.okruhly-stol.sk