20. 2. 2023: Владыка Кіріл Василь призначеный за члена Дікастерії про кавзы святых
Як у суботу, 17-го фебруара 2024-го року, інформовала Пресова служба Святішого Престола, Папа римскый Франциск призначів Ёго Высокопреосвященство владыку Кіріла Василя, архієпіскопа і кошіцького єпархіалного єпіскопа за члена Дікастерії про кавзы святых.
Окрім владыкы Кіріла, были до той дікастерії призначены і далшы новы членове, як пише ся в комунікаті Святішого престола.
„Дякую Святішому Отцёви за довіру. Цїню собі то. Тым менованём мі бізовно прибуде роботы, но вірю, же з помочов Божов то звладну,“ реаґовав владыка Кіріл на свою нову функцію.
„Затля є прискоро бісїдовати, што вшытко ня чекать. Бізовно то буде реґуларна участь на рядных і міморядных засїданях конґреґації, а в дакотрых припадах повнїня ролї такзваного ‚поненса‘, значіть передкладателя завершальной справы і пропозіції при окремых канонізачных процесах, што выжадує комплексне наштудованя канонізачного спису, справ постулаторів і передкладаня фіналной пропозіції про конґреґацію,“ повів кошіцькый єпарха про Пресову канцеларію Конференції єпіскопів Словакії. Архієпіскоп так само попросив о молитвы за тоту службу.
Про владыку Кіріла то не є перша служба про Святїшый Престол. До Кошіць пришов як адміністратор єпархії у 2020-ім роцї, і в роцї 2021 быв призначеный за єпарху.
Перед тым, коли жыв у Римі, быв конзултором веце конґреґацій і членом Верьховного трібуналу Апостольсокй сіґнатуры у Ватіканї. Од мая 2009-го року быв секретарём втогдышнёй Конґреґації про восточны церькви. Втогды быв і призначеный за архієпіскопа. Од кінця юла 2023-го року быв папскым делеґатом із особливыма правами про католиків Сірійско-малабарьской церькви в Індії, окремо в Архієпархії Енакулам-Анґамалі, де рїшыв проблемы з літурґічнов реформов.
Дікастерія про кавзы святых (Dicasterium de Causis Sanctorum) є частёв Римской курії, котра старать ся о баданя і провіріня кавз беатіфікації і канонізації, значіть выголошіня за блаженого або святого.
Петро МЕДВІДЬ, ЛЕМ.фм, языкова і ґрафічна управа: АРК в СР.
