20. 3. 2019: 100 років од народжіня русиньского маляря і педаґоґа Юлія Мушкы

28-го марца в 1919-ім роцї народив ся у Меджілабірцях Юлій Мушка, малярь, педаґоґ, ілустратор, автор учебників вытварного уменя.

Закінчів ґімназію в Ужгородї (1939) коло вызначного умелця. Й. Бокшая, потім штудовав на Словацькій высшій технічній школї в Братїславі (1940 – 1944) і Природознавчій факултї Універзіты Коменьского у Братїславі. Ёго малярьскый талент здоконалёвали такы вызначны умелцї, як М. Бенка, Й. Мудрох і Д. Миллый. Учів і творив у Пряшові. При своїм кумштї хосновав різны вытварны технікы – рисунок, ґрафіка, пастел, жывопис оліём. Свої дїла часто ушоровав до цїклів: Спішскы мотівы, Робота, Із жывота дїтей (1961), Чутя (1962), Нашы співанкы (1976) і тд. Основны творы: ілустрації в часописї „Колокольчик-Дзвіночок‟, Циґаньскы хыжы (1956), Моє місто (1973) і многы далшы. Свої творы выставляв у Пряшові, Кошіцях, Левочі, Свіднику і в іншых містах.

Умер в януарї 2013 р. У Пряшові.

А. Кузмякова, Народны новинкы інфо Русин