20. 3. 2022: Ансамбль Терочка онедолга запрезентує ся в новых облечынях

То буде добрый рік для Терочкы, тыжден тому награла платню з колядами, а тепер може ся похвалити дофінансуваньом з проґраму ЕтноПольща.

11. марця 2022 р. оголосили результаты проґраму ЕтноПольща орґанізуваного Нацийональным Центром Культуры. До тогорічной едициі проґраму зголошено близко 1500 внесків, з чого лем 300 отримало дофінансуваня. Серед выріжненых, на 61 місци – маючы 81 пунктів, нашол ся тіж внесок Стоваришыня «Руска Бурса» в Ґорлицях на закуп лемківского облечыня для діючого при орґанізациі ансамблю Терочка.

Терочка діє і концертує уж од понад 10 років. Початково члены презентували ся в кроях, котры приносили з хыжы, часто такых по родичах ци аж і дідах. Пару років тому ведіня ансамблю перевзял Андрий Трохановскій, котрый од того моменту систематичні старал ся о скомплетуваня ґардеробы колективу в народны лемківскы облечыня. Не єст то єднак такє просте і вымагат немалого буджету.

Перше Терочка купила вышываны оплічата і кошелі, пак кабаты і лайбикы, а одколи в своім репертуарі має тіж гуляня – придбала специяльны до того черевікы. Додатково в минулым році кабаты дівчат прикрасили традицийны, ручні гафтуваны запаскы. Того рока першом інвестицийом ансамблю был плянуваный од долшого часу закуп голошен для хлопів, а на будуче лишыл ся наступный дост великій выдаток – здоблены ґорсеты для дівчат.

Фінансова підпора з проґраму ЕтноПольща в квоті 39 тис. зл дозволит зреализувати закуп ґорсетів для дівчат зо старшой ґрупы ансамблю. Кошт той части облечыня то понад 15 тис. зл. Буде тіж дашто для мужчын, котры кєд отримают своі голошні, будут уж мати праві комплетне облечыня, прикрасят іх іщы ремені і калапы.

Не лем старша ґрупа – молодша Терочка тіж запрезентує ся в новых облечынях

Од парох років при Стоваришыню діє тіж молодша ґрупа ансамблю Терочка. Діточкы в віку од од 6 до 13 років мают за собом уж першы концерты, а аж і нагрываня коляд на іх першу платню. В звязку з тым, же ґрупа возникла дост недавно, іх ґардероба єст іщы убога, зато комплетуваня кроів зачнут од основных части. В тым примірі дофінансуваня дозволит купити оплічата і кабаты для дівчаток та кошелі з лайбиками для хлопців.

Терочка то не першый ансамбль, котрому проґрам ЕтноПольща поміг в дополніню облечыня

Проґрам Нацийонального Центра Культуры веденый єст од 2018 р. В його рамках мож отримати дофінансуваня на реализацию задач, котры допоможут в підтримуваню культуровой достоменности ци дозволят на участ в культурі на локальным та реґіональным рівни. Підниманы ініциятивы можут безпосередньо навязувати до традициі або вказати ю в модерній спосіб. Проґрам підтримує тіж такы задачы, цілю котрых єст дополніня або реновация народных кроів ци обрядовых реквізитів для реґіональных ансамблів, презентуючых ся в традицийных танцях, співах і музиці. В попередніх роках з проґрамовой підпоры скорыстал ансамбль ЛАПіТ «Кычера», котрый завдякы дофінансуваню міг провести реконструкцию святочного облечыня з ріжных части Лемковины.

Ольга ПЕЛЕХАЧ, ЛЕМ.фм

(Публікуєме в оріґіналї – лемківскім варіантї русиньского языка.)