20. 3. 2023: По двох роках засідала Рада єрархів

Офіціално были схвалены літурґічны зміны.

У віторок,19-го марца 2024-го року, одбыло ся на Архієпархіалнім урядї в Пряшові 35-те пленарне засїданя Рады єрархів Ґрекокатолицькой церькви на Словакії. Інформовав о тім говорця Пряшівской архієпархії Михал Павлишиновіч.

Рада єрархів зышла ся по веце як двох роках. Найвысшый орґан митрополітной церькви sui iuris (свого права) перервав свою роботу по тім, што 25-го апріля 2022-го року Папа римскый Франціск прияв зречіня ся пастырьского ряджіня Пряшівской архієпархії архієпіскопом і митрополітом Йоаном Бабяком.

Рада теперь могла обновити своє дїятельство, кедьже од 27-го януара на митрополітнім стілцї має Ґрекокатолицька церьков на Словакії Высокопреосвященого Йону Максима, пряшівского архієпіскопа і митрополіту.

Участны были вшыткы членове

Пленарне засїданя одкрыв Высокопреосвященый Йона. Участныма были вшыткы рядны членове, значіть окрім пряшівского архієпіскопа і архієпіскоп Кіріл Василь – кошыцькый єпарха, владыка Петро Руснак – братїславскый єпарха, владыка Мілан Лах – помічный єпіскоп Братїславской єпархії, емерітный пряшівскый архієпіскоп Йоан Бабяк, і емерітный кошіцькый єпарха Мілан Хаутур.

Як інформовав говорця Пряшівской архієпархії, владыка Мілан Лах став новым секретарём Рады єрархів. Вычеряв у функції дотеперїшнёго секретаря, отця Михала Ондерка, мол. Участным на засїданю Рады єрархів быв і владыка Маріян Андрій Пацак, емерітный торонтьскый єпарха.

Офіціално схвалили літурґічны зміны

Почас робочого проґраму владыкове занимали ся праздником Пасхы і прияли сполочный проґрам літурґічного празднованя в окремых катедралных соборах в Пряшові, Кошіцях і Братїславі.

Єдночасно Рада єрархів офіціално схвалила Управы про служіня Святой літурґії в Пряшівскій, Кошіцькій і Братїславскій єпархії.

Тот документ быв схваленый іщі восени 2022-го року владыком Петром Руснаком, котрый быв втогды братїславскым єпархом і апостольскым адміністратором Пряшівской архієпархії, і архієпіскопом Кірілом Василём – кошіцькым єпархіалным єпіскопом.

Документ дає до практікы дакотры приписы, котры находять ся в документї втогдышнёй Конґреґації про восточны церькви (днесь Дікастерія) під назвов Інштрукція на аплікацію богослужобных приписів Кодексу канонів восточных церьквей із 1998-го року, і дотеперь в Ґрекокатолицькій церькви на Словакії не были заведедены.

Іде наприклад о співаня цїлых трёх антіфон, 33-го псалму холем почас недїльных літурґій і на праздникы, цїлых вшыткых єктеній, ці єктенії за оглашеных, дотримованя алітурґічных днїв почас Великого посту ітд.

Єпіскопи діскутовали і о писмі, котре адресовала Дікастерія про восточны церькви вшыткым восточным єрархам. О дотеперїшнїх приправных роботах на новім ґрекокатолицькім катехізмі інформовав на засїданю владыка Маріян Андрій Пацак, котрый вже скорїше быв установленый Радов єрархів за председу робочой катехетічной комісії.

Далше засїданя наплановане в Братїславі

В рамках засїданя Рады єрархів были єпіскопи інформованы і о роботї на приготовлїню новых учебників про школярїв реліґійной выховы, кедьже в школьскім роцї 2026/2027 зачне платити нова реформа навчаня реліґії.

Так само выслухали собі ректора священьской семінарії Владиміра Секеру Міклуша і віцеректора Петра Міленкія, котры інформовали о дотеперїшнїх скушеностях із запроваджінём пропедевтічного і пасторачного рочника у формації богословів, а так само о можностях запроваджіня до практікы діаконьской службы кандідатів на священство.

Владыкове на кінцю схвалили дату 36-го рядного засїданя Рады єрархів, котре одбуде ся 1-го юла того року в Братїславі.

Петро МЕДВІДЬ, ЛЕМ.фм, языкова і ґрафічна управа: АРК в СР.