20. 4. 2024: Пряшів, Новый Санч і Ряшів хотять обновити Via Regalis

Як інформує Пресове оддїлїня Пряшівского самосправного краю (ПСК), Крайскый музей в Пряшові вступує до проєкту Via Regalis – Середньовіке споїня Пряшова з польскыма містами в рамках вызвы Проґраму Interreg Польща – Словакія 2021 – 2027. На своїм засїданю 15-го апріля 2024-го року то схвалили посланці Заступительства Пряшівского самосправного краю.

Єдночасно схвалили фінанції в сумі майже 20 тісяч евр на сполуфінанцованя, причім ся очекує цїлкова сума проєкту коло 100 тісяч евр. 80 тісяч евр на проєкт партнеры дістануть од Европского фонду реґіоналного розвитку.

Основнов ідеёв проєкту, котрого партнерами суть Окружный музей в Новім Санчу і Окружный музей в Ряшові, є бывше існованя Via Regalis – кралёвской обходной пути. Путь капчала міста од Пряшова через Сабінів, Стару Любовню, Спішску Стару Вес, Старый Санч, Новый Санч аж до Кракова.

Via Regalis хосновала ся од середнёвіку аж по нововік, а была вызначным споїнём теріторій днешнёй Словакії і Польщі. Служыла на транспорт звычайных, но і цїнных недоступных товарів.

„Вызначно помагала і шырїню а мішаню звыків, ремесел, традіцій жытелїв приграніча почас віків. Актівности проєкту поможуть шырити освіту, знаня, інформації і проглубити знаня сполочной културной дїдовизны і ремесел, котры были на обходній пути цїнены цїлы столїтя,“ інформує ПСК.

В рамках проєкту в Крайскім музею в Пряшові приготовить ся довгодоба выстава і творчі варштаты о середньовікій пути, котру наслїдно будуть відїти і заінтересованы в Польщі. Окрем того зреалізує ся середнёвікый ярмарок в Палаці Ракоція, в котрім є Крайскый музей в Пряшові, якый має перепоїти ремеселників, художників і навщівників на єднім місцї.

Далшым выступом проєкту буде варштат партнерів заміряный на сполупрацу партнерскых музеїв.

„Проєкт своїма черезгранічныма актівностями поможе укрїпіти роль културы і утримательного турістічного руху. Дасть так само можность шырити знаня о інтерреґіоналных скапчанях меджі країнами в повязаню з реґіоном і історічныма знанями, шырити знаня в шпеціфічній темі, котров є кралёвска обходна путь,“ пише ПСК, котрый є зряджователём Крайского музея в Пряшові з тым, же ся укрїплять і черезгранічны партнерства в области музейницьтва і додаваня публічных служеб.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: Палац Ракоція в Пряшові. Жрідло: ПСК.