20. 7. 2023: Приятя Александра Зозуляка і Анны Плїшковой віцепріматором Пряшова – Петром Крайняком

У Пряшові другый віцепріматор Містьского уряду Мґр. Петро Крайняк (меджі іншым Русин) прияв Пряшівчана, знаму особность про своє высше 30-рочне діятельство в русиньскім русї на Словакії і в загранічу – Мґр. Александра Зозуляка, жебы го поздоровив з ёго 70-ыма народенинами.

Віцепріматор оцїнив роботу меджі Русинами Александра Зозуляка, котрый мав много різных функцій у русиньскых орґанізаціях, меджі іншым быв єден волебный період і председом Світовой рады Русинів і зорґанізовав у днях 4. – 8. юна 2003 у Пряшові 7. засїданя Світового конґресу Русинів, 1. Світовый форум русиньской молодежи і  богатый з тым звязаный културно-сполоченьскый проґрам. Меджі іншого одкрытя памятной таблы Александрови Духновічови в кріптї Катедралного храму св. Йоана Крестителя у Пряшові ці у втогдышнїй Шарішскій ґалерії у Пряшові выставу пряшівскых русиньскых вытварных умелцїв. Меджі нима выставляв і А. Зозуляк, котрый якраз теперь з нагоды спомянутого свого юбілею выставлять 70 своїх образів у Словацькім народнім музею – Музею русиньской културы у Пряшові. Треба додати, же є дотеперь председом Академії русиньской културы в Словацькій републіцї і 33-їй рік шефредактором і выдавателём одборного і літературного часопису Русин, якы мають свій центер якраз у Пряшові.

На стрїчі обоє высше спомянуты говорили о рядї вопросах, котры ся торкають главно належного удостоєня вызначных особностей Русинів у Пряшові, ці у формі памятных табел, памятників і меновань уліць.

На стрїчі взяла участь і директорка Центра языків і култур народностных меншын Пряшівской універзіты у Пряшові доц. ПгДр. Анна Плїшкова, ПгД, універзітна професорка, в бісїдї з котров оцїнив главно і єй 15-рочну роботу в функції директоркы Інштітуту русиньского языка і културы ПУ в Пряшові, меджі тым ёго выдану богату научну літературу і Меджінародну лїтню школу русиньского языка і културы – Studium Carpatho-Ruthenorum, якого успішный 11. рочник пройшов на Пряшівскій універзітї в днях 11. юна до 1. юла 2023.

Обом гостям віцепріматор Петро Крайняк подаровав цїнны публікації.

-р-