21. 1. 2022: Буковскый: Списованя потвердило мултіетніціту Словакії

Списованя жытелїв, домів і квартелїв 2021 знова потвердило, же Словакія є мултіетнічнов країнов, в котрій коло себе жыє майорітне словацьке населіня і членове народностных меншын.

Конштатує то уповномоченый влады Словацькой републікы про народностны меншыны Ласло Буковскый.

„Є барз важным, жебы собі народностны меншыны знали свої оправданы потребы наформуловати з цїлём розвивати свою ідентічность і бороти ся з асімілачным трендом. Но без ефектівной сполуучасти державы і самосправных орґанів то не принесе очекованый ефект. Як уповномоченый буду і зо своїм урядом при досягованю тых цїлїв далше актівный,“ пише у своїм становиску ку списованю Буковскый.

Публікованы резултаты подля нёго прозраджають велё о етнічнім походжіню обчанів і оддзеркалюють образ словацькой сполочности. Так само говорить, же при выповнїню вопросів у обчанів міцну роль мало повязаня ку етніцітї, но даны не выповідають о тім, як ся обчан в штоденнім жывотї ставляють ку своїй ідентічности.

Уповномоченый влады підкреслив, же політіци і представителї народностных меншын мусять брати до увагы обєктівны резултаты і зачати з нима робити.

„Жебы народностну політіку поставили на реалных фундаментах з реалныма цїлями, в котрых найде ся каждый член народностной меншыны. Словакія не сміє забыти на своє цїнне і розмаїте културне і языкове богатство.“

Буковскый думать, же є потрібне порозуміти цїлям і потребам народностных меншын, і так помагати заховати богату ідентічность Словакії. Так само припомянув, же на основі узнесїня Выбору про народностны меншыны і етнічны ґрупы буде фунґовати робоча ґрупа на інтерпретацію резултатів списованя.

„Членове про робочу ґрупу суть уж номінованы. Очекуєме, же в близкій будучности одбуде ся засїданя,“ додав уповномоченый.

Петро МЕДВІДЬ, Лем.фм. Ґрафічна і языкова управа: ред. АРК в СР.