21. 12. 2021: Публіковали першы резултаты зо списованя на Словакії. Без даных о народностях

Подля резултатів Словацька републіка старіє.

На Словакії жыє 5 449 270 жытелів. З цїлковой кількости жытелїв є 49 процент мужів і 51 процент жен. Такы чісла выходять з першых основных резултатів тогорічного Списованя жытелїв, домів і квартелїв 2021.

В понедїлёк, 20-го децембра 2021-го року, о них інформовали на пресконференції представителї Штатістічного уряду Словацькой републікы. Інформацію принесла пресаґентура TASR. Даны о членах народностных меншын ці о реліґійній приналежности в першых публікованых резултатах не суть.

Словацька републіка старіє

Списованя было про Штатістічный уряд Словацькой републікы вызвов. „Усвідомили сьме собі так само много можностей інформачных технолоґій. Електронічне списованя значно адміністратівно одлегшало жытелїв країны. Далшы резултаты будеме публіковати на зачатку слїдуючого року,“ повів председа уряду Александер Баллек.

Штатістічный уряд, окрем даных од жытелїв, робив і з іншыма здроями. „Вдяка тому сьме здобыли точнїшы інформації“, повіла ґенерална директорка Секції соціалных штатістік і демоґрафії Штатістічного уряду Людмила Іванчікова.

Резултаты за їй словами потвердили тренд, же населїня старіє. В передпродуктівнім віцї (од 0 до 14 років) є на Словакії 16 процент жытелїв, в продуктівнім (од 15 до 64 років) 67 процент, і в попродуктівнім віцї (веце як 65 років) має Словакія 17 процент населїня. „В поріваню з роком 2011 значно наросло чісло жытелїв над 65 років. Видиме то у вышыткы краях, найвеце їх чісло наросло в Тренчаньскім краю,“ уточнила Іванчікова.

Аж 98,9 процента жытелїв з тырвалым перебыванём на Словакії суть гражданы Словацькой републікы. З першых резултатів знаме і то, же о дашто веце жытелїв, конкретно 53,2 процента, жыє в містах, 46,8 процент населїня жыє в селах.

Найвеце гражданів іншой державы жыє в Братіславім краю, найменше в Тренчаньскім.

Резултаты лем в електронічній формі

Вшыткы штатістічны даны суть доступны на вебсайтї www.scitanie.sk. „Сприступнёваня резултатів буде лем в електронічній формі,“ додала директорка Секції штатістікы жытелів Штатістічного уряду Зузана Подманіцька. В януарї бы мав уряд публіковати далшы даны, включно резултатів о жытелях, котры голосять ся ку окремым церьквам і реліґійным общінам.

Списованя на Словакії зачало 15-го фебруара і першый раз у своїй історії было основане на комбінації уж існуючіх даных з даныма од жытелїв. Першый раз было і повно електорнічне. Самосписованя закінчіло ся 31-го марца, асістоване списованя проходило пак од 1-го апріля до кінця октобра.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.