21. 2. 2023: В словацько-польскім пригранічу ся з еврофондів підорить жывотне оточіня і обнова драг
Выголосили першы вызвы з новых еврофондів.
Міністество інвестіцій, реґіоналного розвитку і інформатізації Словацькой републікы в тых днях выголосило першы вызвы з новых еврофондів.
З проґраму черезгранічной сполупраці Interreg з Польщов были выписаны три вызвы на підпору жывота людей в пригранічу. Понад 41 міліонів евр піде лем на охрану жывотного оточіня і оправы драг в пригранічных реґіонах Словакії і Польщі.
Дестякы міліонів у трёх вызвах
Понад 41 міліонів евр піде в новім еврофондовім періодї на крокы проти дослїдків клімматічной зміны, на охрану перед природныма катасрофами, охрану природы, але і на будованя драг, інформовала віцепремєрка і міністерка реґіоналного розвитку Вероніка Ремішова.
Перша вызва з нового проґраму Interreg Польща – Словакія є заміряна на превенцію різіка природных катастроф і адаптацію на зміну клімату. Аж 11 міліонів піде на такы проєкты як суть наприклад зелены стїны ці стрїхы.
„З Польщов капчать нас сполочне природне богатство народных парків Высокы Татры, Пєнины і Полонины, а тым і одповідность за їх захованя про слїдуючі ґенерації. Зато в тых областях підпоруєме охрану природы, але і турізм а роботу гірьской ратуючой службы,“ повіла віцепремєрка.
В рамках другой вызвы піде скоро 4,9 міліона евр на охрану цїнных природных теріторій. Підпору можуть здобыти проєкты заміряны наприклад на утримованя цїлости еколоґічных корідорів, высаджіня стромів або охрану теріторій перед великым затяжінём турістічным рухом.
З понад 25-міліонового паклика в третїй вызві ся підпорять проєкты заміряны на перебудовы, реконштруцкії і модернізації драг. Планує ся управлёвати шырка драгы, жебы легше ходило ся автобусам, будованя пішників і біціґлёвых стежок, як і каналізація на воду з доджу.
Черьпати може і Пряшівскый край
Выголошены вызвы на словацькім боцї граніцї дотуляють ся Жіліньского і Пряшівского самосправного краю, а окресу Спішска Нова Вес в Кошыцькім самосправнім краю. В Польщі суть то области в Слезькім, Малопольскім і Підкарпатьскім воєводстві.
„Потенціал пригранічных реґіонів сьме дотеперь не доказали наповно схосновати. Нашым цїлём є, жебы люде, котры жыють в пригранічу, мали европску якость жывота. Якраз проґрамы Interreg суть міцным і ефектівным інштрументом як условії про лїпшы черезгранічны капчаня творити. Вєдно з нашыма польскыма партнерами маєме намагу, жебы люде мали ку собі ближе,“ додала Ремішова.
Сполупраца з Польщов меджі найуспішнїшыма
Як інформовало міністерство, в проґрамовім періодї, котрый кінчіть, належав проґрам Interreg Польща – Словакія ку найуспішнїшым еврофондовым проґрамам.
Подарило ся вдяка нёму наприклад выбудовати і означіти 2700 черезгранічных рекреачных пішників – научных пішників, турістічных трас і біціґлёвых стежок, змодернізовати 160 км драг і обновити 400 обєктів културной і природной дїдовизны.
На новый проґрамовый період є, окрем проґраму Interreg Польща – Словакія в сумі 162 міліонів евр, схваленый і програм з Чеськов републіков, на котрый є сума 107 міліонів, з Мадярьском в сумі 161 міліонів і Австріёв, де є алокованых 69 міліонів евр.
Проґрам Interreg NEXT, до котрого залучена є і Україна, має выділеных 73 міліонів евр.
Петро МЕДВІДЬ, ЛЕМ.фм. Ґрафічна і языкова коректура: АРК в СР.
