21. 3. 2022: Піддукляньска бібліотека перешла модернізаціёв

Оддїлїня про дорослых в Піддукляньскій бібліотецї у Свіднику перешло обновов. Підпорив тоту обнову зряджователь бібліотекы, котрым є Пряшівскый самосправный край (ПСК), а так само Фонд на підпору уменя. Інформовала о тім говоркыня ПСК Даша Єленёва.

Цїлковы вытраты на модернізацію оддїлїня выросли на приблизно 76 тісяч евр, причім край проєкт підпорив сумов майже 29 тісяч евр. В рамках модернізації оддїлїня здобыло новы реґалы на книжкы, бо попереднї уж мали і веце як 50 років, зробив ся новый централный пулт і підлогы. Оддїлїня має по обнові і нову компютерову техніку.

На першу етапу реконштруцкії просторів бібліотекы мала бы надвязати і друга, заміряна на модернізацію оддїлїня про дїти. До другой етапы бы ся бібліотека хотїла пустити будь у 2023-ім, або найпізнїше у 2024-ім роцї. Вытраты на модернізацію оддїлїня про дїти одгадують на приблизно 60 тісяч евр, а бібліотека потребує здобыти на тото грошы через далшый проєкт.

Піддукляньска бібліотека у Свіднику была основана у 1953-ім роцї і як єдина на Словакії вдяка голандійско-словацькому проєкту у 1993-ім роцї зачала забезпечовати книжно-інформачны службы посередництвом мобілной бібліотекы, котра днесь обслугує 55 сел окресів Свідник і Стропків.

В тім роцї бы мала бібліотека здобыти новый, модернїшый бібліобус, на котрый ПСК выдїлив 230 тісяч евр. У 2021-ім роцї мала 1786 реґістрованых чітателїв, приготовила 175 подій і навщівило єй понад 26 тісяч людей. Цїлково зреалізовала майже 70 тісяч пожычінь книжок.

11-го марца быв змодернізоване оддїлїня посмотрити і председа Пряшівского самосправного краю Мілан Маєрьскый. Як конштатовав на своїм офіціалнім сайтї на сітї Facebook, бібліотека по модернізації вызерать „свіжо“.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.