21. 5. 2019: В Руськім Керестурї інтронізовали першого єпарху

В недїлю, 19-го мая 2019-го року, быв у Руськім Керестурї в Сербії торжественно інтронізованый першый єпарха Ґрекокатолицькой єпархії св. Николая владыка Ґеорґій (Джуджар). Єпархія была еріґована 6-го децембра 2018-го року декретом Папы римского Франціска.

Інторнізація єпархы проходила за участи кардінала Леонарда Сандрі – префекта Конґреґації про восточны церькви, архієпіскопа Лучіана Суріані – апостольского нунція в Сербії, двадцятёх епіскопів і дакілько десяток священиків із пятнадцятёх держав. Меджі єпіскопами были і владыка Мілан (Шашік) – мукачівскый єпарха із своїм помічным єпіскопом Нілом (Лущаком), пряшівскый ахієпіскоп і метрополіта Йоан (Бабяк), кошыцькый єпарха Мілан (Хаутур) ці ніредьгазьскый владыка Авел (Сочка).

 

Выдали Старый завіт по русиньскы

Празднованя офіціалного зачатку урядованя нового єпарху і єпархії зачало вже в суботу, 18-го мая 2019, коли владыка Ґеорґій одслужыв у Церькви св. апостолів Петра і Павла в Новім Садї вечурню, по котрій слїдовав далшый проґрам.

Владыка Ґеорґій в суботу інформовав, же із нагоды выголошіня новой єпархії вышов друком історічно першый русиньскый переклад Старого завіта в містній верзії русиньского языка. Тот переклад робив професор Новосадьской універзіты Янко Рамач і писатель Михайло Рамач. Папа римскый Франціск нагородив перекладателїв Орденом рыцарїв папы Сілвестра. Орден їм в суботу вручав папскый прелат кардінал Леонардо Сандрі.

 

Інтронізація

В недíлю вже торжество перенесло ся до Руського Керестура, центру єпархії. Архієрейска літурґія зачала о 10.00 год. дополíдне в Катедралнім соборі св. отця Николая. Вєдно з новым єпархом єй служыли кардінал Сандрі і архієпіскоп Суріані. На літурґії співав Ужгородьскый Катедралный хор Tеодора Ромжы і домашнíй Катедралный хор св. отця Николая.

Окрeім спомянутой церьковной єрархії брали на інтронізації участь монахы і монахынí різных чінів, представителí сербскых властей – републіковых і самосправных, представителí публічного і културного жывота, як і множество вірників із вшыткых парохій єпархії.

Новый єпарха Ґероґій почас своёй інтронізації нагородив сім своїх священиків тітулом ставрофорного протоєрея. Кардінал Сандрі, котрый в рамках проповідї прочітав поздравны слова од Папы римского Франціска, выразив велике задоволїня, же быв участным той історічной події містной церькви.

 

Історія новой єпархії

Єпархія св. Николая в Руськім Керестурї выникла із Апостольского екзархату про вірників візантійского обряду в Сербії і Чорній Горї. Тот выникнув у 2003-ім роцї, по роспадї Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурї, котрый є і головным центром войводиньскых Русинів. Нова єпархія має 21 парохій і коло 22 тісяч віруючіх. Вірниками новой єпархії суть головно Русины, но мож меджі нима найти і Хорватів ці Румунів. Адміністрація єпархії є в Новім Садї, де была і адміністрація екзархату.

 

Владыка Ґеорґій Джуджар

Першый єпарха Єпархії св. Николая владыка Ґеорґій народив ся у 1954-ім роцї в Дюрдёві, на теріторії днешнёй Сербії. Середню освіту в малій семінарії здобыв у Римі, потім там далше продовжовав у філозофічно-богословскых штудіях. У 1985-ім роцї здобыв у Римі докторат із востночного канонічного права.

Рукоположеный на священика быв у 1980-ім роцї як священик Крижевацькой єпархії. 15 років робив на Конґреґації про восточны церькви в Римі. У 2001-ім році быв призначеный епіскопом-помічником Мукачовской ґрекокатолицькой єпархії і рукоположыв го на єпіскопа Папа римскый Іоан Павел ІІ. По заснованю екзархату в Сербії у 2003-ім роцї став ёго першым екзархом. 6-го децембра 2018-го року быв выменованый за першого єпарху нововыникнутой єпархії.

Петро МЕДВІДЬ, лем.фм, здрой фотоґрафій: Рутенпрес, Греко-Католицьке Закарпаття, звыразнїня писма: -аз-