21. 5. 2023: Полонины поможе спропаґовати новый меджінародный проєкт
Розвитку теріторії Народного Парку Полонины має помочі новый меджінародный проєкт Greenhealth. Інформує о тім Одділіня комунікації Пряшівского самосправного краю.
Цїлём проєкту є сприступнити локаліты реґіону і выбудовати з нього турістічно атрактівне оточіня, но з акцентом на охрану природы. Єдным з партнерів проєкту є Пряшівскый самосправный край (ПСК). Сполупрацовати на нїм буде з Народным парком полонины і Астрономічнов обсерваторійов у Колоніцї, котрой є ПСК зряджователём.
В Полонинах надвяже проєкт на уж розбігнуты і планованы актівности заміряны на утримательный розвиток і екотурізм.
Сполупраца веце країн
Пряшівска жупа стала єдным із семох партнерів проєкту Greenhealth, далшы суть з Іспанії, Хорватії, Швеції, Польщі, Ірландії і Німецька. Посередництвом такзваных „мягкых актівностей“ є проєкт заміряный на укрїпіня звязів меджі охранов біодіверзты і людьскым здоровём.
ПСК посередництвом проєкту прямо підпорить Народный парк Полонины при дізайнованю і креованю новых продуктів турістічного руху.
„Полонины належать меджі нашы дорогоцїнности і є то реґіон, котрый має з погляду турістічного руху і турізму величезный, може затля скрытый потенціал. Намагаме ся го розвивати посередництвом будованя ціклотрас і меншой інфраштруктуры, посередництвом підпоры малого і середнёго подниканя через шпеціалны вызвы заміряны на будованя заряджінь про уквартелёваня і іновації служеб, а в неподліднїм рядї помаганём тутешнїм селам,“ повів в повязаню з проєктом председа ПСК Мілан Маєрьскый.
За ёго словами Народный парк Полонины має што понукнути людям і ёго локаліты собі заслужать увагу, жебы приходило до нёго іщі веце турістів.
„Якраз проєкт Greenhealth нам в тім може значно помочі, як прикладами доброй практікы зо заграніча, так і будованём одборных капаціт і приправов новых проєктів, самособов, то вшытко з акцентом на охрану природы,“ продовжовав пряшівскый жупан Маєрьскый.
Лїсны купелї і жыва лабораторія
Актівности проєкту Greenhealth конкретно заміряють ся на новы продукты турістічного руху, як суть nordic walking, ціклотрасы, лїсны купелї ці лїсны терапії.
Початочнов фазов буде створїня містной жывой лабораторії, такзваного Local Living Labs. Лабораторія рахує з участёв реґіоналных і містных заінтересованых сторон, фаховых партнерів, представителїв орґанізацій про хранены области ці областей здравотных політік, академічной громады і односных містных і реґіоналнх урядів на реґуларных стрїчах.
Занимати ся будуть темов впливу храненых теріторій на людьске здоровя і наслїдно приготовлять інвестіцію, припадно даякы крокы на даній теріторії.
Далшов актівностёв має быти выпрацованя частковых реґіоналных штудій залученых партнерів і наслїдно посередництвом партіціпації з містнов жывов лабораторіёв приправа сполочной штудії включно аналізы і планів.
Проєкт Greenhealth Утримательны хранены теріторії як ключова цїнность про якостный жывот быв схваленый в рамках проґраму Interreg Europe, і ёго ведучім партнером є автономна общіна реґіону Мурсія – Ґенералный директоріят жывотного оточїня.
Має помочі довгодобому цїлю ПСК, ку котрому обовязала ся жупа іщі у 2018-ім роцї, і то розвивати ендоґенный потенціал окресу Снина.
Петро МЕДВІДЬ, ЛЕМ.фм, языкова і ґрафічна управа: АРК в СР.
