21. 6. 2023: Чеськый амбасадор в Пряшові їднав о підпорї турістічного руху і молодежи
Турістічный рух і підниманя навщівности атрактівных місць в краю, як і підпора молодых. То были темы недавного білатералного їднаня веджіня Пряшівского самосправного краю з чеськым послом на Словакії Рудолфом Їндраком.
Нововыменованый чеськый посол навщівив у понедїлёк, 19-го юна 2023-го року, Уряд Пряшівского самосправного краю (ПСК) першый раз у своїй функції. Інформовало о тім Оддїлїня комунікації ПСК.
Надзвычайного і повноважного посла Чеськой републікы в Словацькій републіцї Рудолфа Їндрака гостив підпредседа Пряшівского самосправного краю Штефан Бєляк. Стрїча была заміряна на проглублїня взаємных чехо-словацькых односин і розшырїня сполупраці.
На стрїчі інтензівно діскутовало ся о потребі творїня тїснїшых партнерств меджі різныма орґанізаціями, і то з цїлём підпорити особны контакты і стрїчі жытелїв обидвох країн з пріорітнов підпоров сполочных актівностей дїтей і молодежи.
Помочі тому може наприклад основаня чехословацького фонду владами Чеськой і Словацькой републікы, котрый бы молодым окрім іншого поміг при спознаваню обидвох култур.
Єднов із тем быв і вопрос проглублїня сполупраці меджі універзітами, а так само підпора партнерства реґіоналных самосправ і меджі містами а селами.
Підпредседа ПСК і чеськый посол занимали ся і ґрупов V4, сітуаціёв на Українї, ці сучаснов а будучов помочов тій країнї. Обговорили і тему міґрації україньскых обчанів на Словакію і до Чеськой републікы.
В припадї підпоры турістічного руху точнїше приближыла ся сполупраца меджі Czech turism і Slovakia Travel.
Чеськый амбасадор недавно выразив і свої односины ку Русинам. 12-го юна того року першый раз одбыло ся святкованя Дня Русинів Словакії і в Братїславі.
Святкованя, котры орґанізовав председа Округлого стола Русинів Словакії Петро Штефаняк, одбыли ся в Чеськім домі, і святочный приговор окрім председы Округлого стола Русинів Словакії, уповномоченого влады Словацькой републікы про народностны меншыны Ласла Буковско, мав і посол Чеськой републікы на Словакії Рудолф Їндрак.
Тот на подїї повів, же Чеськый дім є ту і про Русинів, а споминав сполочну історію нашых народів, котра найвеце скапчала ся в рамках 1-ой Чехословацькой републікы.
Петро МЕДВІДЬ, ЛЕМ.фм, языкова і ґрафічна управа: АРК в СР.
